ប្រទេសអេស្ប៉ាញ អៀរឡង់ និងបណ្ដាប្រទេសសមាជិកសហភាពអឺរ៉ុប (EU) ផ្សេងទៀត គ្រោងនឹងទទួលស្គាល់រដ្ឋប៉ាឡេស្ទីន នៅថ្ងៃទី២១ ខែឧសភា។ នេះបើតាមប្រធានគោលនយោបាយការបរទេសរបស់ EU លោក Josep Borrell ដែលបាននិយាយកាលពីល្ងាចថ្ងៃព្រហស្បតិ៍ (ទី៩ ខែឧសភា) នៅមុនពេលមានការបោះឆ្នោត ដែលត្រូវបានរំពឹងទុករបស់អង្គការសហប្រជាជាតិ (UN) នៅថ្ងៃសុក្រ (ទី១០ ខែឧសភា) នេះ ជុំវិញការស្នើសុំរបស់ប៉ាឡេស្ទីន ដើម្បីបានក្លាយជាសមាជិកពេញសិទ្ធិ។

សូមបញ្ជាក់ថា នាយករដ្ឋមន្ត្រីអេស្ប៉ាញលោក Pedro Sanchez បានធ្លាប់បាននិយាយរួចហើយកាលពីខែមីនាថា អេស្ប៉ាញ និងអៀរឡង់ រួមជាមួយនឹងស្លូវេនី និងម៉ាល់តា បានយល់ព្រមចាត់វិធានការជំហានដំបូងឆ្ពោះទៅរកការទទួលស្គាល់រដ្ឋប៉ាឡេស្ទីន នៅក្បែរខាងអ៊ីស្រាអែល ដោយមើលឃើញថា ដំណោះស្រាយរដ្ឋ២ មានសារៈសំខាន់ ចំពោះសន្តិភាពយូរអង្វែង។

ដោយត្រូវបានសួរនៅស្ថានីយវិទ្យុអេស្ប៉ាញ RNE ថា តើថ្ងៃទី២១ ខែឧសភា គឺជាពេលវេលាដែលប្រទេសអេស្ប៉ាញ អៀរឡង់ និងបណ្តាប្រទេស EU ផ្សេងទៀត នឹងទទួលស្គាល់រដ្ឋប៉ាឡេស្ទីនដែរ ឬទេ លោក Borrell បានតបថា បាទមែនហើយ ដោយលើកឡើងពីស្លូវេនីផងដែរ។

ដោយបន្ថែមថា បែលហ្ស៊ិក និងប្រទេសផ្សេងទៀតប្រហែលជាធ្វើតាមដែរនោះ លោក Borrell បានប្រាប់ថា៖ «នេះគឺជាសកម្មភាពនិមិត្តរូបនៃស្មារតីនយោបាយ។ ត្រូវទទួលស្គាល់ឆន្ទៈ ដើម្បីឲ្យរដ្ឋនោះមានលើសពីភាពត្រឹមតែជារដ្ឋមួយ»។

ទូរទស្សន៍ជាតិអៀរឡង់ RTE បាននិយាយកាលពីថ្ងៃព្រហស្បតិ៍ថា អេស្ប៉ាញ អៀរឡង់ ស្លូវេនី និងម៉ាល់តា បានកំពុងរង់ចាំការបោះឆ្នោតរបស់អង្គការសហប្រជាជាតិ ហើយកំពុងពិចារណាលើការទទួលស្គាល់រួមគ្នានៅថ្ងៃទី២១ ខែឧសភា។

អ្នកនាំពាក្យក្រសួងការបរទេសអេស្ប៉ាញមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ហើយក៏មិនមានការអត្ថាធិប្បាយ អំពីកាលបរិច្ឆេទពីប្រទេសផ្សេងទៀតទេដែរ៕