អ្នកវិទ្យាសាស្ត្រនយោបាយម្នាក់មើលឃើញថា បន្ទាប់ពីមានការវាយប្រហារជាច្រើនប្រឆាំងនឹងអ្នកនយោបាយទូទាំងប្រទេសអាល្លឺម៉ង់ ក្នុងរយៈពេលប៉ុន្មានសប្តាហ៍ចុងក្រោយនេះ ចេតនាបង្កឲ្យមានអំពើហិង្សា បានកើនឡើង។

ដោយនិយាយថា អ្នកវាយប្រហារ «មិនពេញចិត្ត និងខឹងសម្បា ចំពោះការធ្វើនយោបាយ» អ្នកវិទ្យាសាស្ត្រនយោបាយ នៅសាកលវិទ្យាល័យ Bundeswehr ក្នុងទីក្រុង Munich គឺលោកស្រី Jasmin Riedl បានពន្យល់ថា អសន្តិសុខសេដ្ឋកិច្ច និងវប្បធម៌ បានបង្ហាញរូបភាពកាន់តែច្បាស់ឡើងៗ ក្នុងរយៈពេលប៉ុន្មានឆ្នាំចុងក្រោយនេះ។ លោកស្រីជឿជាក់ថា ការវាយប្រហារថ្មីៗនេះបង្កគ្រោះថ្នាក់ដល់លទ្ធិប្រជាធិបតេយ្យទាំងមូល។

លោកស្រី Riedl បាននិយាយទៅកាន់ទូរទស្សន៍ Reuters នៅថ្ងៃសុក្រ (១០ ឧសភា) នេះថា៖ «ការវាយប្រហារ បង្កបញ្ហាយ៉ាងខ្លាំងក្លាដល់លទ្ធិប្រជាធិបតេយ្យសេរី។ នៅពេលដែលមនុស្សត្រូវបានវាយប្រហារ ពួកគេបានដកខ្លួនចេញពីឆាកនយោបាយ។ ការធ្វើបែបនោះប៉ះពាល់ដល់ការប្រកួតប្រជែង ខណៈដែលវាធ្វើឲ្យពួកគេរងនូវភាពអយុត្តិធម៌។ ក្រុមមួយចំនួនត្រូវបានដកចេញម្តងមួយៗយ៉ាងស្រួលៗ»។

អធិការបតីអាល្លឺម៉ង់លោក Olaf Scholz បានថ្កោលទោសចំពោះការវាយប្រហារទាំងនោះ ដោយនិយាយថា ជនជាតិអាល្លឺម៉ង់មិនអាច «ឈរនៅស្ងៀម» បានឡើយ នៅពេលដែលមន្ត្រី និងក្រុមអ្នកធ្វើយុទ្ធនាការត្រូវបានវាយប្រហារនោះទេ។ 

គួរបញ្ជាក់ថា កាលពីសប្តាហ៍មុន សមាជិកនៃគណបក្សផ្ទាល់ខ្លួនរបស់លោក Scholz ត្រូវបានវាយប្រហារយ៉ាងធ្ងន់ធ្ងរ រហូតដល់ត្រូវវះកាត់ ខណៈដែលកាលពីថ្ងៃព្រហស្បតិ៍ (៩ ឧសភា) សមាជិកម្នាក់ទៀតនៃគណបក្សរបស់លោកដែលជាអតីតអភិបាលក្រុងប៊ែរឡាំង ក៏ត្រូវបានវាយប្រហារផងដែរ។ ហេតុការណ៍មួយទៀតបានឃើញសមាជិកនៃគណបក្ស Green ត្រូវបានរុញ និងស្តោះទឹកមាត់ដាក់ នៅពេលកំពុងដំឡើងផ្ទាំងរូបភាពយុទ្ធនាការ៕