មហាសន្និបាតអង្គការសហប្រជាជាតិ កាលពីថ្ងៃសុក្រ បានគាំទ្រយ៉ាងលើសលប់ចំពោះបំណងរបស់ប៉ាឡេស្ទីន ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ ដោយទទួលស្គាល់ថា ដែនដីនេះមានលក្ខណៈសម្បត្តិគ្រប់គ្រាន់ ក្នុងការចូលរួមនិងផ្តល់អនុសាសន៍ដល់ក្រុមប្រឹក្សាសន្តិសុខអង្គការសហប្រជាជាតិ។

ការបោះឆ្នោត របស់មហាសន្និបាតដែលមានសមាជិក១៩៣រូប គឺជាការស្ទង់មតិជាសកល នៃការគាំទ្រសម្រាប់បំណងរបស់ប៉ាឡេស្ទីន ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ ជាវិធានការ ដែលនឹងទទួលស្គាល់រដ្ឋប៉ាឡេស្ទីនប្រកបដោយប្រសិទ្ធភាព បន្ទាប់ពីសហរដ្ឋអាមេរិក បានប្រើសិទ្ធិវ៉េតូ នៅក្នុងក្រុមប្រឹក្សាសន្តិសុខអង្គការសហប្រជាជាតិ កាលពីខែមុន។

ប្រទេសហុងគ្រី ស្ថិតក្នុងចំណោមប្រទេសចំនួនប្រាំបីផ្សេងទៀត ដែលបានបោះឆ្នោតប្រឆាំង ប្រទេសកាណាដា បានអនុប្បវាទជាមួយនឹងប្រទេសចំនួន២៤ ផ្សេងទៀត ហើយប្រទេសចិន បានបោះឆ្នោតគាំទ្រសេចក្តីសម្រេចជាមួយប្រទេសចំនួន១៤២ ប្រទេស។

ការជំរុញរបស់ដែនដីប៉ាឡេស្ទីន សម្រាប់សមាជិកភាពពេញលេញរបស់អង្គការសហប្រជាជាតិ ធ្វើឡើងរយៈពេលប្រាំពីរខែមកហើយ នៅក្នុងសង្រ្គាមរវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សាស្ទ្រីប ហើយខណៈអ៊ីស្រាអែល កំពុងពង្រីកការតាំងទីលំនៅនៅតំបន់កាន់កាប់ West Bank អង្គការសហប្រជាជាតិបានចាត់ទុកថាជារឿងខុសច្បាប់។