រដ្ឋមន្ត្រីការបរទេសអូស្ត្រាលី លោកស្រី Penny Wong នៅថ្ងៃសៅរ៍ (ទី១១ ខែឧសភា) នេះ បាននិយាយថា ការគាំទ្ររបស់ប្រទេសលោកស្រី ចំពោះការស្នើសុំរបស់ប៉ាឡេស្ទីន ដើម្បីបានក្លាយជាសមាជិកពេញសិទ្ធិរបស់អង្គការសហប្រជាជាតិ (UN) គឺជាផ្នែកមួយនៃការបង្កើតនូវសន្ទុះ ដើម្បីទទួលបានសន្តិភាព ក្នុងសង្គ្រាមអ៊ីស្រាអែល និងក្រុមហាម៉ាស នៅតំបន់ហ្កាហ្សា។

គួរបញ្ជាក់ថា កាលពីថ្ងៃសុក្រ (ទី១០ ខែឧសភា) ប្រទេសអូស្ត្រាលីបានបោះឆ្នោតឈរខាងសំឡេងភាគច្រើនលើសលប់នៃមហាសន្និបាតអង្គការសហប្រជាជាតិ ដែលគាំទ្រដល់សេចក្ដីសម្រេចទទួលស្គាល់រដ្ឋប៉ាឡេស្ទីនប្រកបដោយប្រសិទ្ធភាព។ ក្រុមប្រឹក្សាសន្តិសុខ ត្រូវបានផ្តល់អនុសាសន៍ឲ្យ «ពិចារណាពីបញ្ហានេះឡើងវិញដោយអនុគ្រោះ»។

សហរដ្ឋអាមេរិកបានវេតូលើអនុសាសន៍មួយ ដែលថា «រដ្ឋប៉ាឡេស្ទីនត្រូវបានចូលជាសមាជិក» ក្នុងការបោះឆ្នោតក្រុមប្រឹក្សាសន្តិសុខ កាលពីខែមុន។ សំណួរពីសមាជិកភាពប៉ាឡេស្ទីន គឺជាបញ្ហាការទូតមួយក្នុងចំណោមបញ្ហាការទូតមួយចំនួនដែលសម្ព័ន្ធមិត្តជិតស្និទ្ធ គឺទីក្រុងវ៉ាស៊ីនតោន និងទីក្រុងកង់បេរ៉ា យល់ឃើញខុសគ្នា។

លោកស្រី Wong បានប្រាប់សន្និសីទសារព័ត៌មាននៅទីក្រុង Adelaide ថា៖ «ភាគច្រើននៃតំបន់របស់យើង និងដៃគូជាច្រើនរបស់យើង ក៏បានបោះឆ្នោតគាំទ្រផងដែរ។ យើងទាំងអស់គ្នាដឹងថា ការបោះឆ្នោតផ្ទាល់ខ្លួនមួយសន្លឹក នឹងមិនបញ្ចប់ជម្លោះនេះនោះទេ ពោលគឺវាបានអូសបន្លាយពេញមួយជីវិតរបស់យើង ប៉ុន្តែយើងទាំងអស់គ្នាត្រូវតែធ្វើអ្វីដែលយើងអាចធ្វើបាន ដើម្បីបង្កើតនូវសន្ទុះឆ្ពោះទៅរកសន្តិភាព»។

សូមបញ្ជាក់បន្ថែមថា ការបោះឆ្នោតមហាសន្និបាត កាលពីថ្ងៃសុក្រ ដែលាមាន ១៤៣សំឡេងគាំទ្រ ៩សំឡេង ក្នុងនោះរួមទាំងសហរដ្ឋអាមេរិក និងអ៊ីស្រាអែលផងដែរប្រឆាំង ហើយ ២៥សំឡេងអនុបវាទ គឺជាការស្ទង់មតិសកលនៃការគាំទ្រ សម្រាប់ការស្នើសុំរបស់ប៉ាឡេស្ទីន។ បច្ចុប្បន្ន ប៉ាឡេស្ទីនជារដ្ឋអ្នកសង្កេតការណ៍មិនមែនជាសមាជិកពេញសិទ្ធិនោះទេ នៅ UN៕