នាយករដ្ឋមន្ត្រីហុងគ្រី លោក Viktor Orban នៅទីក្រុង Budapest បាននិយាយថា ដំណើរទស្សនកិច្ចរបស់ប្រធានាធិបតីចិន លោក Xi Jinping ទៅកាន់ប្រទេសបារាំង ស៊ែប៊ី និងហុងគ្រី គឺកើតឡើង «ត្រូវពេល និងចាំបាច់»។

ក្នុងបទសម្ភាសន៍ជាមួយប្រព័ន្ធផ្សព្វផ្សាយ China Media Group (CMG) លោក Orban បាននិយាយថា ប្រទេសហុងគ្រីនឹងចូលកាន់តំណែងជាប្រធានប្តូរវេននៃក្រុមប្រឹក្សាសហភាពអឺរ៉ុប (EU) ដែលចាប់ផ្តើមពីពាក់កណ្តាលចុងឆ្នាំនេះ។ អាទិភាពមួយក្នុងចំណោមអាទិភាពចម្បងរបស់លោក គឺការរៀបចំផ្លូវនៃទំនាក់ទំនងចិន-សហភាពអឺរ៉ុបឲ្យឆ្ពោះទៅកាន់ទិសដៅត្រឹមត្រូវ ហើយរូបលោកមានទំនុកចិត្ត ព្រោះលោកនឹងទទួលបានការគាំទ្រពីដៃគូនានា។

លោក Orban បាននិយាយថា៖ «ប្រទេសហុងគ្រីកំពុងទៅកៀកនឹងថ្ងៃទី១ ខែកក្កដា ដែលជាពេលវេលាត្រូវដឹកនាំសហភាពអឺរ៉ុបឲ្យឆ្ពោះទៅមុខ។ ហើយបញ្ហាមួយដែលគ្មានអ្វីត្រូវសង្ស័យនោះ គឺទំនាក់ទំនងជាមួយប្រទេសចិន។ ការងាររបស់ខ្ញុំ ដែលនឹងមានអំឡុងពាក់កណ្តាលឆ្នាំនេះ គឺលើកកម្ពស់ទំនាក់ទំនងពាណិជ្ជកម្មចិន-អឺរ៉ុប និងបញ្ឈប់រាល់ការការប្រឹងប្រែងទាំងអស់ដែលកម្រិត និងរាំងស្ទះដល់បរិមាណ និងគុណភាពនៃទំនាក់ទំនងរវាងចិន និងសហភាពអឺរ៉ុប»។

លោកបានប្រាប់ទៀតថា៖ «វានឹងក្លាយជាបញ្ហាដ៏ស្មុគស្មាញ ប៉ុន្តែខ្ញុំមានដៃគូល្អៗមួយចំនួន។ សូមកុំភ្លេចថា លោកប្រធានាធិបតី Xi មកពីទីក្រុងប៉ារីស។ លោកបានទៅទស្សនកិច្ចបារាំង។ បារាំងគឺជាប្រទេសធំមហិមាតាមស្តង់ដារអឺរ៉ុប ហើយខ្ញុំគិតថា វាបង្ហាញថា មានប្រទេសមួយចំនួនផ្សេងទៀតក្រៅពីប្រទេសហុងគ្រីដែលចង់លើកកម្ពស់ ឬរឹតតែធ្វើឲ្យកាន់តែប្រសើរឡើងនូវទំនាក់ទំនង រវាងប្រទេសរបស់អ្នក និងសហភាពអឺរ៉ុប»។

គួរបញ្ជាក់ថា លោក Xi បានទៅដល់រដ្ឋធានីរបស់ហុងគ្រី កាលពីល្ងាចថ្ងៃពុធ (ទី៨ ខែឧសភា) សម្រាប់ដំណើរទស្សនកិច្ចផ្លូវរដ្ឋទៅកាន់ប្រទេសហុងគ្រី ដែលជាការឈប់សំចតចុងក្រោយនៃដំណើរទស្សនកិច្ចនៅអឺរ៉ុបចំនួន ៣ប្រទេសរបស់លោក ចាប់ពីថ្ងៃទី៥ ដល់ថ្ងៃទី១០ ខែឧសភា។ ហើយលោក Orban បានពណ៌នាដំណើរទស្សនកិច្ចរបស់លោក Xi ថា ជាការធ្វើឡើងក្នុង «ពេលវេលាដ៏ត្រឹមត្រូវ និងចាំបាច់» ដើម្បីបង្ហាញពីឆន្ទៈរបស់ប្រទេសចិន ក្នុងកិច្ចសហប្រតិបត្តិការជាមួយអឺរ៉ុប៕