បន្ទាប់ពីចលនាជំរុញយុទ្ធនាការ សម្អាតកម្ពុជា នៅឃុំព្រះធាតុ គឺនៅ​នៅថ្ងៃនេះ​បាន​ចាប់​ផ្តើម​នៅ​ឃុំមៀន ក្នុងស្រុកអូររាំងឪ ខេត្តត្បូងឃ្មុំ។ សិស្សានុសិស្ស លោកគ្រូអ្នកគ្រូ ព្រះសង្ឃ រួមជាមួយ​អាជ្ញាធរ​មូលដ្ឋាន និងប្រជាពលរដ្ឋ ចំនួនចំនួន១៦០០នាក់ បានចេញ​មក​សម្អាត​អនាម័យ​នៅ​ជុំវិ​ញ​ផ្ទះ នៅតាមសាលារៀន វត្តអារាម និងមូលដ្ឋានទាំង១៤ភូមិ និង​បាន​ប្រមូល​បាន​សំរាម​សំណល់​ប្លាស្ទិក​ចំនួន ២តោន។ ចលនានេះបានចាប់ផ្តើមភាពស្អាតចេញពីបេះដូង ដែល​បាន​ចូលរួម​យុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិន​ប្រើ​ថង់​ប្លាស្ទិក​ទេ​» ដែលមានមនុស្សចំនួនជាង៨លាននាក់ បានសម្រេចចិត្តចូលរួមធ្វើឱ្យកម្ពុជា ដែល​ជា​ផ្ទះ​របស់​យើង​ស្អាត និងគ្មានការបំពុលដោយប្លាស្ទិក។

តាមរយៈយុទ្ធនាកថ្ងៃនេះ អ្នកភូមិ​ក្នុង​ឃុំ​មៀន​បាន​ប្រមូល​សំរាម​បាន​លើក​ឡើង​ពី​ការ​ប្តេជ្ញា​ចិត្ត​ចូល​រួម សំអាតបរិស្ថាន ដែលតម្រូវឱ្យមានការចូលរួមចំណាយពេលយ៉ាងតិច១០ទៅ១៥នាទីក្នុង១ថ្ងៃ ប្រមូល​ទុកដាក់សំរាមឱ្យបានត្រឹមត្រូវ។

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បាន​ថ្លែងគាំទ្រឱ្យដល់​ចលនា​សម្អាត​បរិស្ថាន​នេះ​ឱ្យបានផុសផុលនៅតាមមូលដ្ឋានបន្ថែមទៀត ជារៀងរាល់សប្តាហ៍ ក្នុងការជំរុញ​ការ​លើក​កម្ពស់​អនាម័យបរិស្ថាន សោភណភាពរបស់មូលដ្ឋាន និងដើម្បីកម្ពុជាស្អាត ស្រស់បំព្រង គ្មាន​ការបំពុល និងឈានទៅការលប់បំបាត់សំរាម សំណល់ប្លាស្ទិក បន្តិចម្តងៗឱ្យអស់ពីកម្ពុជា ក្នុង​ពេលអនាគតដ៏ខ្លី។

ឯកឧត្តមរដ្ឋមន្រ្តី បានបន្ថែមផងដែរថា ការទុកដាក់សំរាម ក៏ផ្នែកមួយនៃការស្តែងឡើង នូវ​អាកប្បកិយា និងឥរិយាបទ មានន័យថាពីការប្រតិបត្តិរបស់មនុស្ស និងអំពើរបស់មនុស្ស ដែល​បាន​និង​កំពុងប្រព្រឹត្តនៅក្នុងសង្គម។

សូមបញ្ជាក់ថា ក្នុងរយៈពេលចុងក្រោយ ការយល់ដឹងពីការទុកដាក់សំរាម និង​ការ​ចូលរួម​កាត់​បន្ថយ​ការ​ប្រើប្រាស់ប្លាស្ទិក មានការប្រែប្រួលវិជ្ជមាន តាមរយៈការបង្កើតឡើងនូវបទបញ្ញតិ បទ​ដ្ឋានគតិយុត្ត ច្បាប់នានា ស្របតាមការអភិវឌ្ឍប្រទេសជាតិ។ អនុលោមតាម «យុទ្ធសាស្រ្ត​បញ្ចកោណ» ដំណាក់កាលទី១ និងផ្អែកលើមូលដ្ឋានច្បាប់ គោលនយោបាយ និង​យុទ្ធ​សាស្រ្ត​ជាតិ​ដែល​មានជាធរមាន ព្រមទាំងក្របខណ្ឌអនុសញ្ញាអន្តរជាតិពាក់ព័ន្ធ ក្រសួងប​រិស្ថាន​បាន​រៀបចំ​ «យុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨» ដែលផ្តោត​លើ​មុំ​យុទ្ធ​សាស្រ្ត​ចំនួន​៣ គឺភាពស្អាត ភាពបៃតង និងចីរភាព ក្នុងគោលបំណងតម្រង់ទិស និង​ចង្អុល​បង្ហាញ​ការងារ​ជា​អាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ឆ្លើយតប​ទៅ​នឹង​ការ​ប្រែប្រួល​អាកាសធាតុ និងលើកកម្ពស់សេដ្ឋកិច្ចបៃតង សំដៅធានា​សម្រេច​គោលដៅ​នៃ​យុទ្ធសាស្រ្ត​បញ្ចកោណ គឺ «ជាប្រទេសអព្យាក្រឹតកាបូន និងមានគម្របព្រៃឈើ៦០ភាគរយ នៅ​ឆ្នាំ​២០៥០»៕