ទីភ្នាក់ងាររដ្ឋាភិបាលសហរដ្ឋអាមេរិកដែលឃ្លាំមើលសកម្មភាពព្រះអាទិត្យ នៅថ្ងៃសៅរ៍ (ទី១១ ខែឧសភា) បានព្រមានថា វិទ្យុ GPS (ជីភីអេស) និងទំនាក់ទំនងផ្កាយរណប អាចរង​ផល​ប៉ះពាល់ នៅចុងសប្តាហ៍នេះ ដោយសារអណ្ដាតភ្លើងដ៏ខ្លាំងក្លារបស់ព្រះអាទិត្យ។

កាលពីថ្ងៃសុក្រ (១០ ឧសភា) អ្នកប្រើប្រាស់បណ្ដាញសង្គម បានថតជាប់ទិដ្ឋភាពពណ៌នៃពន្លឺ​អឌ្ឍគោល​ខាងជើង ឬពន្លឺ Aurora នៅរដ្ឋ Wisconsin សហរដ្ឋអាមេរិក។ ពាក់ព័ន្ធនឹង​ព្រឹត្តិការណ៍​នេះ មជ្ឈមណ្ឌលព្យាករណ៍អាកាសធាតុអវកាសនៃរដ្ឋបាលមហាសមុទ្រ និង​បរិយាកាស​ជាតិ (NOAA) បានពណ៌នាថា ជាស្ថានភាព «ធ្ងន់ធ្ងរខ្លាំង» ហើយបាននិយាយថា ព្រឹត្តិការណ៍​ចុងក្រោយនៃទំហំស្រដៀងគ្នានេះ បានកើតឡើងនៅក្នុងខែតុលា ឆ្នាំ២០០៣ នៅពេលដែលការដំឡើងបណ្ដាញអគ្គិសនី នៅប្រទេសស៊ុយអែត និងអាហ្វ្រិកខាងត្បូង ត្រូវរងការខូចខាត។

NOAA បាននិយាយថា ព្យុះម៉ាញេទិកផែនដី ទំនងជាកើតមាននៅចុងសប្តាហ៍នេះ ដោយសារការហូរចេញនៃអណ្ដាតភ្លើងព្រះអាទិត្យជាច្រើន កំពុងធ្វើដំណើរឆ្ពោះមកកាន់ផែនដី។ NOAA បានបន្ថែមថា មូលហេតុគឺមកពីកញ្ចុំដុំខ្មៅស្មុគស្មាញធំៗ នៅលើព្រះអាទិត្យ ដែលមានអង្កត់ផ្ចិត ១៧ដងនៃផែនដី៕