អេមីរ៉ាត់អារ៉ាប់រួម (UAE) នៅថ្ងៃសៅរ៍ (ទី១១ ខែឧសភា) នេះ បានវាយបកទៅលោក Benjamin Netanyahu បន្ទាប់ពីនាយករដ្ឋមន្ត្រីអ៊ីស្រាអែលរូបនេះ បាននិយាយថា រដ្ឋឈូងសមុទ្រ អាចចូលរួមជួយរដ្ឋាភិបាល នាពេលអនាគត នៅក្នុងតំបន់ហ្កាហ្សា បន្ទាប់ពីចប់សង្រ្គាម។

រដ្ឋឈូងសមុទ្រដ៏លេចធ្លោ និងមានឥទ្ធិពលមួយនេះ គឺជារដ្ឋមួយក្នុងចំណោមរដ្ឋអារ៉ាប់មួយចំនួន ដែលមានទំនាក់ទំនងការទូតផ្លូវការជាមួយអ៊ីស្រាអែល ដែលខ្លួនបានបន្តរក្សាឲ្យស្ថិតស្ថេរ អំឡុងសង្គ្រាមជាង ៦ខែរបស់អ៊ីស្រាអែល នៅតំបន់ហ្កាហ្សា ទោះបីជាទំនាក់ទំនងហាក់ដូចជាមានភាពរង្គោះរង្គើក៏ដោយ។

រដ្ឋមន្ត្រីការបរទេស គឺព្រះអង្គម្ចាស់ Sheikh Abdullah bin Zayed Al Nahyan បានរិះគន់លោក Netanyahu នៅព្រឹកព្រលឹមនេះតាមរយៈការបង្ហោះលើបណ្ដាញសង្គម X ដោយលើកឡើងថា ទីក្រុងអាប៊ូដាប៊ី បានបរិហារការលើកឡើងរបស់មេដឹកនាំអ៊ីស្រាអែល។

តាមរយៈការបង្ហោះសារជាភាសាអារ៉ាប់ ព្រះអង្គម្ចាស់ Sheikh Abdullah បានលើកឡើងថា៖ «UAE សូមសង្កត់ធ្ងន់ថា នាយករដ្ឋមន្ត្រីអ៊ីស្រាអែលមិនមានលទ្ធភាពផ្លូវច្បាប់ណាមួយ ដើម្បីចាត់វិធានការនេះនោះទេ ហើយ UAE បដិសេធមិនទទួលយកផែនការណាមួយដែលមានបំណងផ្តល់ការធានាដល់វត្តមានរបស់អ៊ីស្រាអែល នៅក្នុងតំបន់ហ្កាហ្សាស្ទ្រីបនោះទេ»។

ព្រះអង្គម្ចាស់ Sheikh Abdullah បានមានព្រះបន្ទូលថា UAE នឹងត្រូវបានរៀបចំ ដើម្បីគាំទ្ររដ្ឋាភិបាលប៉ាឡេស្ទីន ដែលបំពេញតាមក្តីសង្ឃឹម និងក្ដីប្រាថ្នារបស់ប្រជាជនប៉ាឡេស្ទីន ដែលព្រះអង្គបានបន្ថែមថា ក្នុងនោះរួមទាំងឯករាជ្យផងដែរ។

គួរបញ្ជាក់ថា នៅក្នុងបទសម្ភាសន៍មួយដែលបានចាក់ផ្សាយក្នុងសប្តាហ៍នេះ លោក Netanyahu បាននិយាយថា ប្រទេសអារ៉ាប់រួម (UAE) អារ៉ាប៊ីសាអ៊ូឌីត និងប្រទេសដទៃទៀត អាចជួយដល់រដ្ឋាភិបាលស៊ីវិលជាមួយពលរដ្ឋហ្កាហ្សា នៅដែនដីនេះ បន្ទាប់ពីចប់សង្គ្រាម៕