សហរដ្ឋអាមេរិក នៅថ្ងៃសៅរ៍ (ទី១១ ខែឧសភា) នេះ បាននិយាយថា ខ្លួនមានការព្រួយបារម្ភ​យ៉ាងខ្លាំង​ចំពោះការធ្លាក់ចុះលទ្ធិប្រជាធិបតេយ្យ នៅប្រទេសហ្សកហ្ស៊ី ដែលទីក្រុងវ៉ាស៊ីនតោន បាន​និយាយថា មានជម្រើស ក្នុងការគាំទ្រសេចក្ដីស្នើច្បាប់ភ្នាក់ងារបរទេស «រចនាប័ទ្ម​វិមានក្រឹម​ឡាំង» ឬបើមិនដូច្នោះទេគោលដៅអឺរ៉ូ-អាត្លង់តិករបស់ប្រជាជន។

ទីប្រឹក្សាសន្តិសុខជាតិរបស់សហរដ្ឋអាមេរិក លោក Jake Sullivan បានសរសេរ​នៅលើ​បណ្ដាញ​សង្គម X ថា៖ «យើងមានការព្រួយបារម្ភយ៉ាងខ្លាំងពីការដើរថយក្រោយនៃលទ្ធិប្រជាធិបតេយ្យ នៅប្រទេសហ្សកហ្ស៊ី»។

លោកបាននិយាយថា៖ «សមាជិកសភាហ្សកហ្ស៊ីប្រឈមនឹងជម្រើសដ៏សំខាន់មួយ ពោលគឺថា តើត្រូវ​គាំទ្រគោលដៅអឺរ៉ូ-អាត្លង់ទិករបស់ប្រជាជនហ្សកហ្ស៊ី ឬអនុម័ត​ច្បាប់ភ្នាក់ងារ​បរទេសតាម​រចនាប័ទ្ម​វិមានក្រឹមឡាំង ដែលប្រឆាំងទៅនឹងតម្លៃប្រជាធិបតេយ្យ។ សម្រាប់ពួកយើង យើងឈរ​ខាងប្រជាជនហ្សកហ្ស៊ី»។

គួរបញ្ជាក់ថា សេចក្ដីស្នើច្បាប់ដែលនឹងតម្រូវឲ្យអង្គការទទួលបានច្រើនជាង ២០ភាគរយ​នៃ​មូលនិធិ​របស់ពួកគេពីបរទេសចុះឈ្មោះជា «ភ្នាក់ងារមានឥទ្ធិពលពីបរទេស» បានបញ្ឆេះ​ឲ្យមាន​វិបត្តិ​នយោបាយរីករាលដាលភ្លាមៗ នៅហ្សកហ្ស៊ី ជាកន្លែងដែលមនុស្សរាប់ពាន់នាក់ បានធ្វើ​បាតុកម្មតវ៉ា ដើម្បីទាមទារឲ្យដកសេចក្ដីព្រាងច្បាប់នេះ៕