អង្គការសហប្រជាជាតិ (UN) នៅថ្ងៃសៅរ៍ (ទី១១ ខែឧសភា) បានឲ្យដឹងថា ទឹកជំនន់​យ៉ាង​គំហុក​ភ្លាមៗដែលបានហូរកាត់ភាគខាងជើងប្រទេសអាហ្វហ្គានីស្ថាន បាន​បណ្ដាល​ឲ្យ​មនុស្ស​ជាង ២០០នាក់ ស្លាប់នៅក្នុងខេត្តតែមួយ។

អង្គការអន្តរជាតិ សម្រាប់ទេសន្តរប្រវេសន៍ (IOM) របស់ UN បានប្រាប់សារព័ត៌មាន AFP ថា មនុស្ស​ជាង ២០០នាក់ បានបាត់បង់ជីវិត និងផ្ទះរាប់ពាន់ខ្នងត្រូវបានបំផ្លាញ ឬរងការខូចខាត នៅ​ក្នុង​ខេត្ត Baghlan ដោយសារភ្លៀងធ្លាក់ខ្លាំង កាលពីថ្ងៃសុក្រ (ទី១០ ឧសភា) បាន​បង្ក​ឲ្យ​មាន​ទឹកជំនន់យ៉ាងធំ។

នៅក្នុងតំបន់ Baghlani Jadid តែមួយ ផ្ទះរហូតដល់ ១.៥០០ខ្នង ត្រូវបានបំផ្លាញ ឬរង​ការ​ខូចខាត ហើយ «មនុស្សជាង ១០០នាក់ បានស្លាប់»។ នេះបើ​តាម​អ្នក​ដឹកនាំ​ឆ្លើយ​តប​បន្ទាន់​របស់ IOM ដែលបាននិយាយដោយដកស្រង់តួលេខពី​អាជ្ញាធរ​គ្រប់គ្រង​គ្រោះមហន្ត​រាយ​ជាតិ​អាហ្វហ្គានីស្ថាន។

ចំណែកមន្ត្រីរដ្ឋាភិបាលតាលីបង់ បានឲ្យថា មនុស្ស ៦២នាក់ បានស្លាប់ គិតត្រឹមយប់ថ្ងៃទី១០ ខែ​ឧសភា។ តាមរយៈសេចក្តីថ្លែងការណ៍មួយនៅលើបណ្ដាញសង្គម X (ពីមុនជា Twitter) នៅ​ថ្ងៃ​ទី១១ ខែឧសភានេះ ដោយមិនបានបែងចែកចំនួនអ្នកស្លាប់ និងរបួសនោះ ហើយ​បើ​ទោះបី​ជា​មិន​បាន​ប្រាប់សារព័ត៌មាន AFP ថា មនុស្សរាប់សិបនាក់ បានស្លាប់ក៏ដោយ ក៏អ្នកនាំពាក្យលោក Zabihullah Mujahid បានឲ្យដឹងថា៖ «បងប្អូនជន​រួមជាតិ​របស់​យើង​រាប់រយ​នាក់​បាន​បាត់​បង់​ជីវិត ដោយសារទឹកជំនន់ដ៏អាក្រក់នេះ»។

គួរបញ្ជាក់ថា ខេត្តជាច្រើននៅទូទាំងប្រទេសអាហ្វហ្គានីស្ថាន បានជួបប្រទះនឹងទឹកជំនន់ភ្លាមៗ ដោយ​ក្រុមមន្ត្រីនៅភាគខាងជើងខេត្ត Takhar បានរាយការណ៍ថា មនុស្ស ២០នាក់ បាន​ស្លាប់​នៅ​ថ្ងៃ​ទី១១ ខែឧសភានេះ។

ក្រសួងការពារជាតិបានប្រាប់ថា បុគ្គលិក​សង្គ្រោះ​បន្ទាន់​ត្រូវ​បាន​ដាក់​ពង្រាយ​ទៅ​កាន់​តំបន់​រង​គ្រោះ ហើយកំពុងប្រញាប់ប្រញាល់ជួយសង្គ្រោះអ្នករបួស និងអ្នកជាប់នៅក្នុងតំបន់ជន់លិច៕