សហប្រធានក្រុមការងារគណបក្សចុះមូលដ្ឋានស្រុកទ្រាំងឯកឧត្តម សុខ ពុទ្ធិវុធ និងឯកឧត្តម សុខ ផេង បានអំពាវនាវដល់បងប្អូនជនរួមជាតិខ្មែរ ពិសេសប្រជាពលរដ្ឋរស់នៅក្នុងស្រុកទ្រាំងខេត្តតាកែវ បន្តរួមគ្នាចូលរួមទ្រយ៉ាងពេញទំហឹង ចំពោះគម្រោងព្រែកជីកហ្វូណនតេជោ ដែលនិងចាប់ផ្ដើមសាងសង់ នាចុងឆ្នាំ២០២៤ ខាងមុខនេះ។

សហប្រធានក្រុមការងារគណបក្សចុះមូលដ្ឋានស្រុកទ្រាំង បានអំពាវនាវបែបនេះ ក្នុងឱកាសអញ្ជើញដឹកនាំកិច្ចប្រជុំគណៈពង្រឹងក្រុមការងារចុះមូលដ្ឋានស្រុកទ្រាំង នាព្រឹកថ្ងៃទី១១ ខែឧសភា ឆ្នាំ២០២៤នេះ នៅទីស្នាក់ការបក្សស្រុកទ្រាំង។

ក្នុងឱកាសនោះ ឯកឧត្តម សុខ ពុទ្ធិវុធ មានប្រសាសន៍ថា គម្រោងព្រែកជីកហ្វូណនតេជោ គឺជាព្រែកជីកប្រវត្ដិសាស្រ្តទី១ នៅកម្ពុជា ដែលជាគំនិតផ្ដួចផ្ដើមរបស់សម្ដេចតេជោ ហ៊ុន សែន អតីតនាយករដ្ឋមន្រ្ដី និងជាប្រធានព្រឹទ្ធសភា ហើយសម្ដេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ជាអ្នកបន្តស្នាដៃ និងជំរុបន្ថែមនៃការអនុវត្តនៃគម្រោងនេះឱ្យទទួល ​បានជោគជ័យនាពេលអនាគត។

ឯកឧត្តមានប្រសាសន៍បន្តថា ព្រែកជីកហ្វូណនតេជោ ត្រូវបានសាងសង់តភ្ជាប់ផ្លូវទឹករវាង​ទន្លេទៅកាន់​សមុទ្រកម្ពុជា ដែលមានប្រវែង១៨០គីឡូម៉ែត ឆ្លងកាត់ខេត្តចំនួន៤ រួមមាន៖ខេត្តកណ្ដាល តាកែវ កំពត និងខេត្តកែប។ ក្រោយពីសាងសង់រួចគម្រោងព្រែកជីកមួយនេះ និងផ្ដល់អត្តប្រយោជន៍ដ៏មហាសាលជាច្រើនដល់ប្រជាជន និងប្រទេសជាតិទាំងមូល។

លោកស្រី ប៊ុត ស្រីមុំ ប្រជាពលរដ្ឋរស់នៅ ស្រុកទ្រាំងបានបង្ហាញក្ដីសោមនស្សរីករាយ និងប្រកាសគាំទ្រយ៉ាងពេញទំហឹងចំពោះគម្រោងព្រែកជីកហ្វូណនតេជោនាពេលនេះ។ លោកស្រីជឿជាក់ថា គម្រោងព្រែកជីកមួយនេះ និងផ្ដល់អត្តប្រយោជន៍ជាច្រើន ដល់ប្រជាជន និងប្រទេសជាតិនាថ្ងៃអនាគត។

ជាមួយគ្នានោះដែរលោក ទិត ឌឿន ក៏បានបង្ហាញគាំទ្រចំពោះគម្រោងព្រែកជីកហ្វូណនតេជោនេះក្រោមគំនិតផ្ដួចផ្ដើមរបស់សម្ដេចតេជោ។ លោកក៏សង្ឃឹមយ៉ាងមុតមាំថាក្រោយសាងសង់រួច ព្រែកជីកនេះនឹងជួយដល់សេដ្ឋកិច្ចប្រជាពលរដ្ឋ និងប្រទេសជាតិបានល្អប្រសើរទៅមុខទៀត។

សូមជម្រាបថា តាមការបញ្ជាក់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា គម្រោងព្រែកជីកហ្វូណនតេជោនេះ គ្រោងចាប់ផ្ដើមអនុវត្តនៅចុងឆ្នាំ ២០២៤ ឬដើមឆ្នាំ ២០២៥ ខាងមុខ ដែលគម្រោងនេះ នឹងផ្ដល់អត្ថប្រយោជន៍ជាច្រើនដល់សង្គម និងសេដ្ឋកិច្ចកម្ពុជា៕