ចំបាប់៖ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា បានបង្ហាញនូវក្ដីរំពឹងកីឡាចំបាប់កម្ពុជា នឹងអាចបំបែកកំណត់ត្រាមេដាយស៊ីហ្គេមឆ្នាំ២០១៣ នៅមីយ៉ាន់ម៉ា ក្នុងការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
ការលើកឡើងបែបនេះ បន្ទាប់ពីលោកបានឧបត្ថម្ភស្បែកជើងសម្រាប់ហ្វឹកហាត់ និងប្រកួតកីឡាចំបាប់ចំនួន ៣៧គូស្មើនឹង ៦ពាន់ដុល្លារដល់ក្រុមកីឡាចំបាប់ជម្រើសជាតិកម្ពុជា កាលពីថ្ងៃទី០២ ខែសីហា ឆ្នាំ២០២១ ម្សិលមិញ។ នាយកវិទ្យាស្ថាន CamEd Business School ដដែលបានបញ្ជាក់ថា ដោយសារបច្ចុប្បន្នក្រុមកីឡាចំបាប់ជម្រើសជាតិកម្ពុជា មិនទាន់មានការប្រមូលផ្ដុំហ្វឹកហាត់ ពោលគឺបានត្រឹមហាត់តាម Online បានធ្វើឲ្យសហព័ន្ធមានក្ដីបារម្ភពីការត្រៀមប្រកួតកីឡាស៊ីហ្គេមឆ្នាំ២០២១ នៅវៀតណាម ដែលពន្យារពេលទៅខែមេសា ឆ្នាំ២០២២។ ដូច្នេះស៊ីហ្គេមនៅវៀតណាម លោករំពឹងត្រឹមរក្សាកំណត់ត្រាមេដាយដូចស៊ីហ្គេម ឆ្នាំ២០១៩ នៅហ្វីលីពីន តែឆ្នាំ២០២៣ នៅកម្ពុជា លោកជឿជាក់ថា កីឡាចំបាប់កម្ពុជាអាចបំបែកកំណត់ត្រាមេដាយស៊ីហ្គេមឆ្នាំ២០១៣ នៅមីយ៉ាន់ម៉ា ដែលធ្លាប់ដណ្ដើមបានមេដាយមាស៤, ប្រាក់២ និងសំរឹទ្ធ២។
សូមបញ្ជាក់ថា កីឡាចំបាប់គឺជាប្រភេទកីឡាដ៏មានសក្ដានុពលមួយរបស់កម្ពុជា អ្វីដែលគួរឲ្យកត់សម្គាល់ក្នុងស៊ីហ្គេមឆ្នាំ២០១៣ នៅមីយ៉ាន់ម៉ា ក្រុមកីឡាចំបាប់ជម្រើសជាតិកម្ពុជា ដណ្ដើមមេដាយច្រើនជាងគេសរុប ១០គ្រឿងគឺមានមេដាយមាស៤, ប្រាក់២ និងសំរឹទ្ធ៤ មុនអវត្ដមាន ២លើកជាប់គ្នាក្នុងស៊ីហ្គេមឆ្នាំ២០១៥ នៅសិង្ហបុរី និងស៊ីហ្គេមឆ្នាំ២០១៧ នៅម៉ាឡេស៊ី ដោយសារម្ចាស់ផ្ទះមិនបានដាក់ប្រភេទកីឡាចំបាប់ រហូតដល់ស៊ីហ្គេមឆ្នាំ២០១៩ នៅហ្វីលីពីន ទើបក្រុមកីឡាចំបាប់កម្ពុជាបានចូលរួមជាថ្មី និងដណ្ដើមបានមេដាយសំរឹទ្ធ ៥គ្រឿងពុំមានមេដាយមាស ឬប្រាក់ ដូចកាលស៊ីហ្គេមនៅមីយ៉ាន់ម៉ាឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
