កំពង់ឆ្នាំង ៖ នៅព្រឹកថ្ងៃទី១៣ ខែឧសភា ឆ្នាំ២០២៤នេះ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះខេត្តកំពង់ឆ្នាំង និងជាប្រធានក្រុមប្រឹក្សាស្តារ អភិវឌ្ឍន័ វិស័យកសិកម្ម និងជនបទ រួមនិងក្រុមការងារ បានអញ្ជើញចុះជួបសំណេះសំណាលជាមួយក្រុមប្រឹក្សាឃុំទាំង១៤ក្នុងស្រុករលាប្អៀរ ដើម្បីយល់ដឹងកាន់តែច្បាស់ពីបញ្ហាប្រឈមនានា និងការដោះស្រាយ, សន្តិសុខក្នុងមូលដ្ឋាន, រួមនិងវឌ្ឍនភាពវិស័យកសិកម្មនៅតាមឃុំនីមួយៗផងដែរ៕

នៅក្នុងពិធីសំណេះសំណាលនេះ ក្រុមប្រឹក្សាឃុំទាំង១៤ និងក្រុមប្រឹក្សាស្រុករលាប្អៀរ ខេត្តកំពង់ឆ្នាំង បានបង្ហាញពីការដឹកនាំរបស់ពួកគាត់នៅតាមមូលដ្ឋាន មានសន្តិសុខល្អ គ្មានក្មេងទំនើង កត្តាជីវភាពប្រជាពលរដ្ឋ ការអភិវឌ្ឍន៍ក្នុងមូលដ្ឋាន និងបញ្ហាប្រឈមមួយចំនួនជាមួយវិស័យកសិកម្មពាក់ព័ន្ធការបំរែបំរួលអាកាសធាតុនាពេលកន្លងមក ។ បញ្ហាប្រឈម និងទុក្ខកង្វល់របស់ប្រជាពលរដ្ឋ ត្រូវបានដោះស្រាយរួចរាល់ ។ សមិទ្ធផលនានាជាច្រើនដែលរាជរដ្ឋាភិបាលបានកសាង និងអភិវឌ្ឍក្នុងឃុំស្រុកកន្លងមក មានទាំងមណ្ឌលសុខភាព, សាលារៀនចាប់ពីថ្នាក់មតេយ្យ ដល់ថ្នាក់វិទ្យាល័យ, វត្តអារាម, ផ្លូវថ្នល់, ប្រព័ន្ធប្រឡាយទឹកជាដើម កំពុងត្រូវបានប្រជាពលរដ្ឋប្រើប្រាស់យ៉ាងពេញចិត្តផងដែរ ។

ឯកឧត្តមបណ្ឌិតសភាចារ្យ ក៏បានមានប្រសាសន៍ថា៖ ការរីកចម្រើនលើគ្រប់វិស័យនាពេលបច្ចុប្បន្ននេះ ទាំងការរស់នៅប្រកបដោយសុខសន្តិភាព ទាំងការរីកចម្រើនចំពោះសមិទ្ធផលនានា ដោយសារការខិតខំប្រឹប្រែងឥតឈប់ឈររបស់សម្តេចតេជោ ហ៊ុន សែន អតីនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាសព្វថ្ងៃ ។ សម្តេចតេជោ ហ៊ុន សែន បានខិតខំលះបង់គ្រប់បែបយ៉ាង ដើម្បីជាតិមាតុភូមិ តាំងពីការរំដោះប្រទេសពីបនប្រល័យពូជសាសន៍ ប៉ុល ពត ហើយបង្កើតឱ្យមានសុខសន្តិភាពគ្រប់មូលដ្ឋាន និងធ្វើការអភិវឌ្ឍប្រទេសជាតិមានភាពសម្បូរសប្បាយមកដល់ពេលបច្ចុប្បន្ននេះ មិនតែប៉ុណ្ណោះសម្តេចធិបតី ហ៊ុន ម៉ាណែត ជានាយករដ្ឋមន្ត្រីថ្មី ក៏បានខិតខំពោះពារគ្រប់ឧបសគ្គបន្តការពារសុខសន្តិភាព នឹងធ្វើការអភិវឌ្ឍប្រទេសជាតិឱ្យរឹតតែមានភាពសម្បូរសប្បាយជាបន្តទៀត មិនអោយប្រជាពលរដ្ឋខកបំណងឡើយ។

ឯកឧត្តមបានបញ្ជាក់ទៀតថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត បាន និងកំពុងបន្តផែនការអភិវឌ្ឍន៍លើគ្រប់វិស័យជាច្រើនទៀតនៅទូទាំងប្រទេស ទាំងហេដ្ឋារចនាសម្ព័ន្ធដោយធ្វើយ៉ាងណាបង្កលក្ខណៈងាយស្រួល ដែលជាតម្រូវការចាំបាច់របស់ប្រជាប្រជាពលរដ្ឋក្នុងការធ្វើដំណើរ ឬដឹកកសិផលផ្សេងៗឆ្លងកាត់ពីតំបន់មួយទៅតំបន់មួយដោយមិនមានការលំបាកនោះឡើយ។ ម្យ៉ាងទៀតគម្រោងព្រែជីកហ្វូណនតេជោ ប្រវែង១៨០គីឡូម៉ែត្រ កំពុងត្រូវបានរៀបចំកសាង ដើម្បីសេដ្ឋកិច្ចប្រទេសកម្ពុជាបានរីកចម្រើនបន្ថែមទៀត៕ ដោយ ÷ កាំង ហុងវាស្នា