យោធាអ៊ីស្រាអែល បានប្រកាសកាលពីថ្ងៃអាទិត្យ (១២ ឧសភា) ថាខ្លួនបានបើកច្រកឆ្លងកាត់ថ្មីមួយ ដើម្បីនាំយកជំនួយមនុស្សធម៌ទៅកាន់តំបន់ហ្កាហ្សាស្ទ្រីប ដែលរងគ្រោះដោយទុរ្ភិក្ស។ នៅក្នុងសេចក្តីប្រកាសព័ត៌មានមួយ យោធាបានប្រកាសពីការបើក «ច្រកព្រំដែន អេរ៉េស (Erez) ភាគខាងលិច» ថ្មីរវាងអ៊ីស្រាអែល និងភាគខាងជើងហ្កាហ្សា ដោយមានការសម្របសម្រួលជាមួយសហរដ្ឋអាមេរិក។

យោងតាមយោធានេះបានឱ្យដឹងថា ច្រកឆ្លងកាត់ថ្មីនេះស្ថិតនៅភាគខាងលិចនៃច្រកឆ្លងកាត់ អេរ៉េស ដែលខិតទៅជិតឆ្នេរសមុទ្រ ដោយបន្ថែមថា ផ្លូវឆ្លងកាត់ត្រូវបានសាងសង់ដោយយោធាអ៊ីស្រាអែល «ជាផ្នែកមួយនៃកិច្ចខិតខំប្រឹងប្រែងដើម្បីបង្កើនផ្លូវសម្រាប់ជំនួយទៅកាន់តំបន់ហ្កាហ្សា ជាពិសេសទៅភាគខាងជើងនៃតំបន់ហ៊ុមព័ទ្ធ»។

កាលពីដើមខែមេសា រដ្ឋាភិបាលអ៊ីស្រាអែល បានអនុម័តការបើកឡើងវិញបណ្តោះអាសន្ននៃច្រក អេរ៉េស ដែលត្រូវបានគេស្គាល់ថាជាច្រក បេត ហានួន (Beit Hanoun) ទៅកាន់ប៉ាឡេស្ទីន ដើម្បីអនុញ្ញាតឱ្យជំនួយមនុស្សធម៌ចូលទៅតំបន់ហ្កាហ្សា។

ការវាយលុករបស់អ៊ីស្រាអែលរយៈពេលជាង ៧ ខែនៅតំបន់ហ្កាហ្សា ដែលបានចាប់ផ្តើមនៅក្នុងការសងសឹកចំពោះការវាយលុករបស់ពួកហាម៉ាស លើទីតាំងអ៊ីស្រាអែលភាគខាងត្បូង បាននាំឱ្យជនជាតិប៉ាឡេស្ទីន ស្លាប់ជាង ៣៥.០០០ នាក់ ហើយបានធ្វើឱ្យផ្នែកជាច្រើននៃតំបន់នេះក្លាយជាផេះផង់ ខណៈមនុស្សម្នាកំពុងអត់ឃ្លាន ហើយជំនួយគឺមិនគ្រប់គ្រាន់នោះទេ៕