មន្ត្រីយោធាម្នាក់បានប្រាប់សារព័ត៌មានស៊ីនហួរ កាលពីថ្ងៃអាទិត្យ (១២ ឧសភា) ថា មនុស្ស ១០ នាក់ត្រូវបានសម្លាប់នៅក្នុងការប៉ះទង្គិចគ្នាយ៉ាងខ្លាំងក្លារវាងកងកម្លាំងរដ្ឋាភិបាលយេម៉ែន ដែលមានការទទួលស្គាល់ជាអន្តរជាតិ និងក្រុមឧទ្ទាម ហ៊ូទី (Houthi) នៅក្នុងខេត្ត ម៉ារីប (Marib) ភាគកណ្តាលរបស់ប្រទេស។

ប្រភពយោធាបាននិយាយក្នុងលក្ខខណ្ឌមិនបញ្ចេញឈ្មោះថា «ការប្រឈមមុខដាក់គ្នាយ៉ាងសាហាវបានកើតឡើងរវាងកងកម្លាំងមកពីកងពលតូច ចាយអ៊ិនស៍ (Giants) ដែលជាផ្នែកមួយនៃកងកម្លាំងគាំទ្ររដ្ឋាភិបាលរួម និងក្រុមយុទ្ធជន ហ៊ូទី» នៅលើតំបន់ប្រយុទ្ធ ហារីប (Harib) ភាគខាងត្បូងនៃខេត្តយុទ្ធសាស្ត្រ ម៉ារីប ដែលនៅជាប់នឹងខេត្តសម្បូរប្រេង សាបវ៉ា (Shabwa) កាលពីយប់ថ្ងៃអាទិត្យ។

ខេត្ត ម៉ារីប បានក្លាយជាសមរភូមិចម្បងនៃជម្លោះយេម៉ែន ដែលអូសបន្លាយចាប់តាំងពីក្រុម ហ៊ូទី បានចាប់ផ្តើមការវាយលុកដ៏ធំមួយនៅដើមឆ្នាំ២០២១ ក្នុងគោលបំណងដណ្តើមបានការគ្រប់គ្រងទាំងស្រុងនៃខេត្តដែលសម្បូរថាមពលមួយនេះ។

ប្រភពនោះបាននិយាយថា ការប៉ះទង្គិចគ្នាអស់រយៈពេលមួយម៉ោងពាក់ព័ន្ធនឹងការប្រើប្រាស់អាវុធធុនធ្ងន់ដែលបណ្តាលឱ្យសមាជិកកងកម្លាំងរដ្ឋាភិបាល ៤ នាក់ និងយុទ្ធជនហ៊ូទី ៦ នាក់ស្លាប់ ហើយមនុស្ស ៩ នាក់ទៀតរងរបួសទាំងសងខាង៕