ប្រធានាធិបតីទួរគី លោក តាយីប អឺដូហ្កាន់ (Tayyip Erdogan) បាននិយាយកាលពីថ្ងៃអាទិត្យថា សហរដ្ឋអាមេរិក និងបណ្តាប្រទេសអ៊ឺរ៉ុប មិនបានធ្វើគ្រប់គ្រាន់ ដើម្បីដាក់សម្ពាធលើអ៊ីស្រាអែលយល់ព្រមបទឈប់បាញ់នៅតំបន់ហ្កាហ្សា បន្ទាប់ពីការសម្រេចរបស់ក្រុមសកម្មប្រយុទ្ធប៉ាឡេស្ទីនហាម៉ាស ក្នុងការទទួលយកសំណើបទឈប់បាញ់មួយ។

ប្រទេសទួរគី បានស្តីបន្ទោសការវាយប្រហាររបស់អ៊ីស្រាអែលលើតំបន់ហ្កាហ្សា ដោយបានអំពាវនាវឲ្យមានបទឈប់បាញ់ជាបន្ទាន់ និងបានរិះគន់អ្វីដែលខ្លួនហៅថា ជាការគាំទ្រដោយគ្មានលក្ខខណ្ឌសម្រាប់អ៊ីស្រាអែលដោយលោកខាងលិច។

ទីក្រុងអង់ការ៉ា បានបញ្ឈប់រាល់ពាណិជ្ជកម្មជាមួយអ៊ីស្រាអែល ហើយបាននិយាយថា ខ្លួនបានសម្រេចចិត្តចូលរួមជាមួយគំនិតផ្តួចផ្តើមរបស់អាហ្វ្រិកខាងត្បូង ដើម្បីឲ្យអ៊ីស្រាអែលត្រូវបានកាត់ទោសពីបទប្រល័យពូជសាសន៍ នៅតុលាការយុត្តិធម៌អន្តរជាតិ (ICJ)។

ថ្លែងទៅកាន់ក្រុមសាស្ត្រាចារ្យមូស្លីមនៅទីក្រុងអ៊ីស្តង់ប៊ុល លោក អឺដូហ្កាន់ បាននិយាយថា ក្រុមហាម៉ាស បានទទួលយកសំណើបទឈប់បាញ់ដោយកាតា និងអេហ្ស៊ីបក្នុង «ជំហានឆ្ពោះទៅរកបទឈប់បាញ់ដ៏យូរអង្វែង» ប៉ុន្តែរដ្ឋាភិបាលរបស់នាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) មិនចង់ឲ្យសង្រ្គាមចប់នោះទេ។

លោក អឺដូហ្កាន់ បានបន្តថា៖«ការឆ្លើយតបរបស់រដ្ឋាភិបាលលោក ណេតាន់យ៉ាហ៊ូ គឺវាយប្រហារប្រជាជនស្លូតត្រង់នៅទីក្រុងរ៉ាហ្វា ដោយសំដៅទៅលើទីក្រុងហ្កាហ្សា ដែលអ៊ីស្រាអែលកំពុងកំណត់គោលដៅ។ រដ្ឋាភិបាលនេះ បានបញ្ជាក់ច្បាស់ថា អ្នកណាជាភាគីសន្តិភាព និងការសន្ទនា ហើយអ្នកណាចង់ឲ្យមានការប៉ះទង្គិចគ្នាបន្ត ហើយមានការបង្ហូរឈាមតទៅទៀតនោះ»។