ភ្នំពេញ ៖ កម្ពុជា និងចិននឹងធ្វើសមយុទ្ធយោធារួមគ្នាជាទ្រង់ទ្រាយធំ ដោយសមយុទ្ធ ដែលមានឈ្មោះថា«នាគមាស»ឆ្នាំ២០២៤នេះ នឹងមានកងទ័ពនៃប្រទេសទាំងពីរចូលរួមជាងពីរពាន់នាក់ និងសព្វាវុធ, ឧត្ថម្ភាចក្រ រួមទាំងនាវាចម្បាំងទាំងខ្នាតធំ និងតូចចំនួន១៤គ្រឿង។

 ថ្លែងប្រាប់អ្នកសារព័ត៌មាននៅក្នុងសន្និសីទកាសែត នារសៀលថ្ងៃទី១៣ ខែឧសភា ឆ្នាំ២០២៤នេះ លោកឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការដ្ឋាននៃកងយោធពលខេមរភូមិន្ទបាន បញ្ជាក់ថា សមយុទ្ធយោធារវាងកងទ័ពកម្ពុជា និងចិនលើកទី៦ នេះនឹងមានលក្ខណៈទ្រង់ទ្រាយធំជាងមុនៗទៅទៀតដោយមានកងទ័ពកម្ពុជាជាង១៣០០នាក់ ខណៈកងទ័ពចិនចំនួនជាង៧០០នាក់ និងមាន នាវាចម្បាំងរបស់ចិនខ្នាតធំចំនួនបីគ្រឿង និងវាកម្ពុជាចំនួន១១គ្រឿង។

លោកឧត្តមសេនីយ៍ទោ ថោង សូលីម៉ូ បានលើកឡើងទៀតថា សមយុទ្ធយោធារវាងកម្ពុជា និងចិននេះ នឹងធ្វើឡើងក្រោមវិធានបទ «ប្រតិបត្តិការប្រឆាំងអំពើភេរវកម្មរួម និងការសង្រ្គោះមនុស្សធម៌» ចាប់ពីថ្ងៃទី១៦ ដល់ថ្ងៃទី៣០ ខែឧសភា ឆ្នាំ២០២៤ នៅភ្នំជុំសែនរីករាយ ខេត្តកំពង់ឆ្នាំង និងខេត្តព្រះសីហនុ ខណៈសមយុទ្ធដែលនឹងមានបាញ់គ្រាប់ពិតផងដែរនោះ គឺធ្វើឡើងតាមរយៈកិច្ចសហប្រតិបត្តិការ ប្រចាំឆ្នាំទ្វេភាគីរវាងកម្ពុជា និងចិន ក្នុងគោលបំណងផ្លាស់ប្តូរបទពិសោធន៍គ្នាទៅវិញទៅមក និងបង្កើន សមត្ថភាពកងទ័ពឲ្យកាន់តែល្អប្រសើរបន្ថែមទៀត ពុំមែនធ្វើដើម្បីជាការគំរាមកំហែង ឬធ្វើឲ្យប៉ះពាល់ដល់អ្នកណា ឬប្រទេសណានោះឡើយ។

បើតាមអ្នកនាំពាក្យរបស់អគ្គបញ្ជាការកងទ័ពរូបនេះ បានបញ្ជាក់បន្ថែមទៀតថា ការធ្វើសមយុទ្ធរួម គ្នារវាងកងទ័ពកម្ពុជា និងចិននេះ គឺបានធ្វើឡើងចំនួនប្រាំលើកមកហើយ ខណៈរាល់ការចំណាយគឺរដ្ឋាភិបាលចិនជាអ្នកចេញទាំងអស់ ហើយក្នុងអំឡុងពេលធ្វើសមយុទ្ធនេះ ក៏មានការចូលរួមសង្កេតការណ៍ពី សំណាក់សមាជិកអាស៊ានចូលរួមផងដែរ។ 

 តាមរយៈសន្និសីទសារព័ត៌មាននេះដែរ លោកឧត្តមសេនីយ៍ទោ ថោង សូលីម៉ូ ក៏បានអំពាវនាវដល់ បងប្អូនប្រជាពលរដ្ឋទាំងអស់កុំឲ្យមានការភ័យខ្លាច ខណៈពេលដឹកសម្ភារ និង ចល័តកម្លាំងចេញពីខេត្ត ព្រះសីហនុ ទៅកាន់ខេត្តកំពង់ឆ្នាំង ដែលជាទីតាំងសមយុទ្ធ និងពេលសមយុទ្ធបាញ់គ្រាប់ពិតជាដើម៕

អត្ថបទ ៖ បាន ចក់