លោក Jake Sullivan ដែលជាទីប្រឹក្សាសន្តិសុខជាតិរបស់លោក Joe Biden បាននិយាយការពារការសម្រេចរបស់លោកប្រធានាធិបតីរូបនេះ ក្នុងការផ្អាកការបញ្ជូនគ្រាប់បែកដ៏មានឥទ្ធិពលទៅកាន់ប្រទេសអ៊ីស្រាអែល ដោយនិយាយថា «អ្នកពិតជានឹងឃើញមានជនស៊ីវិលបាត់បង់ជីវិតក្នុងចំនួនដ៏ច្រើន» ប្រសិនបើកងកម្លាំងអ៊ីស្រាអែលទម្លាក់គ្រាប់បែកទាំងនោះ នៅទីក្រុង Rafah។

នៅក្នុងបទសម្ភាសន៍មួយ តាមប្រព័ន្ធផ្សព្វផ្សាយ ABC News ក្នុងកម្មវិធីសប្ដាហ៍នេះ (ABC News' This Week) លោក Sullivan បាននិយាយថា ប្រតិបត្តិការនៅទីក្រុង Rafah នឹងឃើញអ៊ីស្រាអែលសម្លាប់យុទ្ធជនហាម៉ាសមួយចំនួន ប៉ុន្តែបានបន្ថែមថា «ពួកហាម៉ាសជាច្រើននឹងរលាយបាត់ដោយសារតែពួកគេជាភេរវករ។ ពួកគេមិនមែនជាអ្នកប្រយុទ្ធដែលមានការរៀបចំតាមរបៀប ដែលយើងគិតដល់យោធាធម្មតាទូទៅនោះទេ»។

ហើយលោក Sullivan បាននិយាយថា លោក Biden «មិនចង់ឃើញអាវុធរបស់អាមេរិកត្រូវបានប្រើប្រាស់ក្នុងប្រតិបត្តិការបែបនេះទេ»។ តែលោក Sullivan បានបញ្ជាក់បន្ថែមថា ចំណាត់ការនេះមានន័យថា លោក Biden មានបំណង «បោះបង់អ៊ីស្រាអែលចោលនោះឡើយ» ដោយលោកចង់ផ្ដោតលើប្រតិបត្តិការពិសេស ដែលលោកមិនជឿថា នឹងយកឈ្នះលើក្រុមហាម៉ាស ហើយវានឹងបង្កឲ្យមានគ្រោះថ្នាក់ធ្ងន់ធ្ងរ»។

គួរបញ្ជាក់ថា ការអត្ថាធិប្បាយរបស់លោក Sullivan នេះ បានកើតឡើងនៅប៉ុន្មានថ្ងៃបន្ទាប់ពីការព្រមានដ៏ចម្រូងចម្រាសរបស់លោក Biden ដែលថា សហរដ្ឋអាមេរិកនឹងឈប់ផ្គត់ផ្គង់អាវុធឲ្យអ៊ីស្រាអែល ប្រសិនបើកងកម្លាំងរបស់ប្រទេសនេះធ្វើការលុកលុយទ្រង់ទ្រាយធំលើទីក្រុង Rafah៕