រថក្រោះអ៊ីស្រាអែល ដែលបានការពារពីការវាយប្រហារដ៏ខ្លាំងក្លាពីលើអាកាស និងតាមជើងគោក បានរុញច្រានបន្ថែមទៀតចូលទៅក្នុងជំរំចាបាលៀ ( Jabalia )ក្នុងតំបនហ្កាហ្សាស្ទ្រីបភាគខាងជើង នៅថ្ងៃចន្ទនេះ ខណៈដែលរថក្រោះ និងកងទ័ព បានឆ្លងកាត់ផ្លូវហាយវេដ៏សំខាន់មួយ នៅជាយក្រុងរ៉ាហ្វានៅភាគខាង ត្បូង។

នៅក្នុងជំរំចាបាលៀ រថក្រោះ កំពុងព្យាយាមឆ្ពោះទៅកាន់កណ្តាលជំរុំនេះ ជាជំរំធំបផុតក្នុងចំណោមជំរំជនភៀសខ្លួនជាប្រវត្តិសាស្ត្រចំនួន៨ នៅតំបន់ហ្កាហ្សា។ អ្នកស្រុក បាននិយាយថា គ្រាប់ផ្លោងរថក្រោះបានធ្លាក់នៅចំកណ្តាលជំរុំ ហើយការវាយប្រហារតាមអាកាស បានបំផ្លាញផ្ទះជាច្រើនខ្នង។

អ្នកស្រុក និងក្រុមគ្រូពេទ្យ បាននិយាយថា មនុស្សជាច្រើននាក់ បានស្លាប់ និងរងរបួស នៅក្នុងការវាយប្រហារតាមអាកាសជាបន្តបន្ទាប់លើជំរុំនេះ នៅពេលយប់។ គ្រូពេទ្យ បាននិយាយថា ពួកគេមិនអាចបញ្ជូនក្រុមទៅកាន់តំបន់មួយចំនួនដែលរងការវាយប្រហារនោះទេ ដោយសារការវាយប្រហារកាន់តែខ្លាំងឡើងរបស់អ៊ីស្រាអែល ប៉ុន្តែពួកគេ មានរបាយការណ៍អំពីចំនួនអ្នកស្លាប់។

ចំណែកនៅទីក្រុងរ៉ាហ្វាជិតព្រំដែនជាមួយអេហ្ស៊ីប អ៊ីស្រាអែល បានបង្កើនការវាយប្រហារតាមអាកាស និងជើងគោក នៅលើតំបន់ភាគខាងកើតនៃទីក្រុងនេះ ដោយបានសម្លាប់មនុស្ស នៅក្នុងការវាយប្រហារតាមអាកាសលើផ្ទះមួយ ក្នុងសង្កាត់មួយរបស់ប្រេស៊ីល។

អ្នកស្រុក បាននិយាយថា រថក្រោះអ៊ីស្រាអែល បានកាត់ផ្តាច់ផ្លូវ Salahuddin ដែលកាត់ផ្នែកខាងកើតនៃទីក្រុងនេះ ខណៈដែលផ្នែកខាងកើតនៃទីក្រុងរ៉ាហ្វា ក្លាយជា «ទីក្រុងខ្មោច»ហើយនោះ។