ក្រសួងការបរទេសចិន នៅថ្ងៃចន្ទ (ទី១៣ ខែឧសភា) បានជំរុញឲ្យប្រទេសហ្វីលីពីនឈប់ធ្វើការអត្ថាធិប្បាយមិនទទួលខុសត្រូវ និងបញ្ឈប់ការព្យាយាមបំភ័ន្តសហគមន៍អន្តរជាតិ បន្ទាប់ពីហ្វីលីពីនបានចោទប្រកាន់ចិនថា បានសាងសង់ «កោះសិប្បនិម្មិត» នៅក្នុងដែនទឹកដែលមានជម្លោះ។

ហ្វីលីពីន កាលពីថ្ងៃសៅរ៍ (១១ ឧសភា) បានប្រាប់ថា ខ្លួនបានដាក់ពង្រាយនាវាទៅកាន់តំបន់មានជម្លោះ ក្នុងសមុទ្រចិនខាងត្បូង ជាកន្លែងដែលខ្លួនបានចោទប្រកាន់ចិនថា បានសង់កោះមួយនៅតំបន់ថ្មប៉ប្រះទឹក Sabina។

ការិយាល័យរបស់ប្រធានាធិបតីលោក Ferdinand Marcos Jr បានឲ្យដឹងនៅក្នុងសេចក្តីថ្លែងការណ៍មួយថា ឆ្មាំល្បាតសមុទ្របានបញ្ជូននាវាមួយគ្រឿង ដើម្បីទៅត្រួតពិនិត្យសកម្មភាពខុសច្បាប់របស់ចិន ដែលកំពុងសាងសង់ «កោះសិប្បនិម្មិត»។

ពាក់ព័ន្ធនឹងការចោទប្រាកន់នេះ អ្នកនាំពាក្យក្រសួងការបរទេសចិន លោក Wang Wenbin បានប្រាប់ថា៖ «ការចោទប្រកាន់ដែលធ្វើឡើងដោយភាគីហ្វីលីពីនប្រឆាំងនឹងភាគីចិន គឺគ្មានមូលដ្ឋានច្បាស់លាស់ និងជាការប្រឌិដ្ឋសុទ្ធសាធ»។

គួរបញ្ជាក់ថា ប្រទេសចិនទាមទារស្ទើរតែទាំងអស់នៃផ្នែកផ្លូវទឹកដ៏សំខាន់នេះ ក្នុងនោះរួមទាំងផ្នែកដែលទាមទារដោយហ្វីលីពីន ប្រ៊ុយណេ ម៉ាឡេស៊ី កោះតៃវ៉ាន់ និងវៀតណាមផងដែរ។ នៅឆ្នាំ២០១៦ តុលាការអាជ្ញាកណ្តាលអចិន្ត្រៃយ៍ បានសម្រេចថា ការទាមទាររបស់ទីក្រុងប៉េកាំងមិនមានមូលដ្ឋានក្រោមច្បាប់អន្តរជាតិនោះទេ ជាការសម្រេចដែលចិនបដិសេធ៕