កំពង់ឆ្នាំង៖ នៅរសៀលថ្ងៃទី១៣ ខែឧសភា ឆ្នាំ២០២៤នេះ ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង បានព្រមានចំពោះជនណាក៏ដោយ អ្នកមានលុយណាក៏ដោយ ដែល​ចង់​ចូល​មក​ឈូសយកដីព្រៃលិចទឹកក្នុងស្រុកកំពង់លែង និងស្រុកដទៃទៀតក្នុងខេត្តកំពង់ឆ្នាំង នឹង​ត្រូវ​ចាប់​ខ្លួន​ភ្លាម​តែម្តង ព្រោះមកដល់ដំណាក់កាលនេះហើយ មិនអប់រំណែនាំទៀតឡើយ។

ឯកឧត្តម ស៊ុន សុវណ្ណារិទ្ធិ បានសង្កត់ធ្ងន់ថា ឯកឧត្តម​មិនទុក​អោយ​ថ្នាក់​ដឹកនាំ​ចាប់​ឯកឧត្តម​មុន​នោះ​ទេ គឺឯកឧត្តមនឹងចាប់ជនដែលឆ្លៀតឱកាសឈូសទន្ទ្រានដីព្រៃលិចទឹកទាំងនោះ មក​ផ្តន្ទា​ទោស​តាម​ច្បាប់​ដោយមិនលើកលែងអោយឡើយ។ ចំណែកមន្ត្រីមាន​សមត្ថកិច្ច​ដែល​មាន​ភារកិច្ច​ការពារ​ ទប់ស្កាត់ និងបង្រ្កាបបទល្មើសបំផ្លាញព្រៃលិចទឹកនេះ ក៏ត្រូវរួម​សាមគ្គីគ្នា​មើល​អោយ​បាន​ម៉ត់ចត់​ក្នុង​ដែនសមត្ថកិច្ចរបស់ខ្លួន ប្រសិនបើមាន​ករណី​ឈូស​បំផ្លាញ​ព្រៃលិច​ទឹក​យក​ដី​ហើយ​នោះ មន្ត្រីមានសមត្ថកិច្ចទាំងនោះក៏មិនរួចខ្លួនដែរ។ ចំពោះ​អាជ្ញាធរ​ភូមិឃុំ​ដែល​មាន​ដីព្រៃ​លិច​ទឹកទាំង​តំបន់២ និងតំបន់៣ ក្នុងស្រុកកំពង់លែង និងស្រុកដទៃទៀត ត្រូវពិនិត្យ​មើល​អោយ​បាន​ច្បាស់​លាស់ តាមតំបន់ដែលខ្លួនកាន់កាប់ កុំចេះតែស៊ីញ៉េអោយគេចូលបំផ្លាញ ហើយ​បើ​មាន​ជន​មិន​ស្គាល់អត្ត​សញ្ញាណ​ណា​ក៏ដោយ​ដែល​ចូលមកក្នុ​ង​ភូមិឃុំ​របស់​ខ្លួន​ពាក់ព័ន្ធ​នឹង​ដីព្រៃ​លិច​ទឹក​ទាំង​នោះ ត្រូវតែថតទុក និងរាយការណ៍ជាបន្ទាន់មកកាន់ស្រុក ខេត្ត។ ដោយឡែកត្រាក់ទ័រវិញ ឯកឧត្តមបានអោយកម្លាំងនគរបាលតាមដានមើលមួយថ្ងៃ៣ដង មានព្រឹក រសៀល យប់ ថាតើ​ពេល​ពួក​គេចេញទៅធ្វើអ្វី ឈូសដីអ្វី ភ្ជួដីអ្វីអោយប្រាកដ ព្រោះភាគច្រើនលួចធ្វើតែពេលយប់។

សូមបញ្ជាក់ជូនថា ថ្មីៗកន្លងមកនេះ នៅក្នុងស្រុកកំពង់លែង អង្គភាពប្រឆាំង​អំពើ​ពុក​រលួយ​បាន​ចាប់​អភិបាលរងស្រុកម្នាក់ ប្រធានការិយាល័យប្រជាពលរដ្ឋម្នាក់ និងឈ្មួញដីម្នាក់ យកមក​ដាក់​ពន្ធនាគារ​ក្នុងករណីលួចចូលឈូសទន្ទ្រានដីព្រៃលិចទឹកក្នុងតំបន់២រួចហើយ ដែលករណីនេះ ធ្វើ​អោយ​អ្នកពាក់ព័ន្ធរឿងនេះខ្លាចរអា ហើយមកដល់ពេលនេះ សំណុំរឿងនេះ ស្ថិតក្នុង​ការ​ស៊ើប​អង្កេត​របស់​អង្គភាពប្រឆាំងអំពើពុករលួយនៅឡើយ។ ប្រជាពលរដ្ឋសាទរនឹងចំណាត់ការក្តៅ ដែល​ឯកឧត្តមអភិបាលខេត្តបានធ្វើក្នុងថ្ងៃនេះ ៕ កាំង ហុងវាស្នា