បាត់ដំបង ៖ ​មន្ត្រីមន្ទីរសុខាភិបាលខេត្តបាត់ដំបង​ បាន​អំពាវនាវ​ដល់ពលរដ្ឋ ដែលធ្លាប់ប្រាស្រ័យ​ទាក់ទង​​ ជាមួយស្ត្រី ទើបឆ្លងកូវីដ១៩ ​មានទីលំនៅក្នុងសង្កាត់ក្ដុលដូនទាវ ​ក្រុងបាត់ដំបង ទៅជួប​មន្ត្រីសុខាភិបាលខេត្ត​ ដើម្បីយកសំណាកទៅពិនិត្យរកកូវីដ១៩ ​និងដាក់ខ្លួននៅដាច់ដោយឡែក (ចត្តាឡីស័ក) ។

ក្នុងពេលចុះផ្សព្វផ្សាយបញ្ហាជំងឺកូវីដ១៩ នៅព្រឹកថ្ងៃទី៣ ​ខែសីហា នេះក្នុងសង្កាត់ក្ដុលដូនទាវ លោកវេជ្ជបណ្ឌិត អ៊ុក វិទ្យា​ អនុប្រធានមន្ទីរសុខាភិបាលខេត្តបាត់ដំបង​ បានឱ្យដឹងថា​ បច្ចុប្បន្ន ស្ត្រីឆ្លងកូវីដ ១៩ ទើបមកពីអាមេរិកនោះ ​កំពុងសម្រាកព្យាបាលនៅក្នុងមន្ទីរពេទ្យបង្អែកខេត្ត ដោយក្រុមគ្រូពេទ្យជួរមុខ ​បាននឹងកំពុងយកចិត្តដាក់ថែទាំ ។ ចំពោះអ្នកធ្លាប់ប្រាស្រ័យទាក់ទង អំឡុងស្ត្រីឆ្លងជំងឺកូវីដ១៩នេះ ​ជំនាញទើបរកឃើញបាន៨នាក់ ​ដែល​ជា​សមាជិកក្រុមគ្រួសារ ខណៈអ្នក​ផ្សេងទៀត មន្ត្រីសុខាភិបាល ​អាជ្ញាធរមូលដ្ឋាន​ កំពុងធ្វើការស្រាវជ្រាវស្វែងរកបន្ថែម ។

លោកវេជ្ជបណ្ឌិត ​បានស្នើឱ្យអាជ្ញាធរមូលដ្ឋាន ​បន្តជួយស្រាវជ្រាវរកអ្នកធ្លាប់ជួបប្រាស្រ័យជាមួយ អ្នកជំងឺ ​ដើម្បីឲ្យពួកគេទៅជួបមន្ត្រីសុខាភិបាល ​ដើម្បី​យក​សំណាក​ទៅពិនិត្យ និងដើម្បីធ្វើ​ចត្តាឡីស័ក​ ចៀសវាង​កុំឱ្យមានការឆ្លងរាលដាលក្នុងសហគមន៍ ។

លោក អែម ស៊ីយឿន ចៅសង្កាត់ក្ដុលដូនទាវ​ បានបញ្ជាក់ថា ​ក្រោយពីការរកឃើញផ្ទុកកូវីដ១៩ លើស្ត្រីម្នាក់ ​ក្នុងតំបន់នេះ ​ធ្វើឱ្យពលរដ្ឋមានការព្រួយបារម្ភ ​ដោយអ្នកខ្លះមិនហានចេញក្រៅ ។

ស្ត្រី ​ដែលទើបឆ្លងកូវីដ១៩ ​រស់នៅក្នុងសង្កាត់ក្ដុលដូនទាវ ក្រុងបាត់ដំបងនេះ​ គឺជាអ្នកជំងឺ ​កូវីដទី ៩ហើយ ​ដែលបានរកឃើញនៅក្នុងខេត្តបាត់ដំបង ​ខណៈអ្នកឆ្លងចំនួន៨នាក់ ផ្សេងទៀត ​បាន​ជា​សះ ស្បើយអស់ហើយ៕

អត្ថបទ៖ បាន សុខរិទ្ធ