ប្រជាពលរដ្ឋ និងពលករខ្មែរដែលកំពុងធ្វើការនៅ សាធារណរដ្ឋកូរ៉េ បានចេញវីដេអូប្រកាសគាំទ្រ និងស្វាគមន៍ដំណើរទស្សនកិច្ចផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលនឹង​អញ្ជើញ​ដឹកនាំ​គណៈប្រតិភូទៅបំពេញទស្សនកិច្ចផ្លូវការនៅសាធារណរដ្ឋកូរ៉េ ចាប់ពីថ្ងៃទី១៥ ដល់ថ្ងៃ​ទី១៨ ខែឧសភា ឆ្នាំ ២០២៤នេះ តបតាមការអញ្ជើញរបស់ឯកឧត្តម យួន សកយ៉ល (Yoon Suk Yeol) ប្រធានាធិបតីនៃសាធារណរដ្ឋកូរ៉េ។

ដូចសព្វមួយដង ក្នុងឱកាសដំណើរទស្សនកិច្ចរបស់សម្ដេចធិបតី នាយករដ្ឋមន្រ្ដីនៃក្រៅប្រទេស ប្រជា​ពលរដ្ឋ ពលករ និងនិស្សិតខ្មែរ ដែលកំពុងតែរស់នៅ ធ្វើការ និងសិក្សានៅក្រៅប្រទេស តែង​តែ​ចេញ​មកស្វាគមន៍ និងគាំទ្រចំពោះដំណើរទស្សកិច្ចរបស់ម្ដេចជានិច្ច។ ក្នុងឱកាសដំណើរទស្សនកិច្ចលើកនេះ ប្រជាពលរដ្ឋខ្មែរដែលកំពុងរស់នៅ ធ្វើការ និងបន្តការ​សិក្សា​នៅ​កូរ៉េ បានបង្ហាញក្ដីសប្បាយរីករាយ និងរំពឹងខ្ពស់ពីសមិទ្ធផលនៃទំនាក់ទំនង និងកិច្ច​សហប្រតិបត្តិការ​រវាងថ្នាក់កំពូលរបស់កម្ពុជា និងបណ្ដាថ្នាក់ដឹកនាំប្រទេសជាមិត្ត។

សូមជម្រាបថា ក្នុងឱកាសដំណើរទស្សនកិច្ចរបស់សម្ដេចធិបតី និងលោកជំទាវបណ្ឌិតលើកនេះ មាន​ការ​អញ្ជើញអមដំណើរ ដោយឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុម​ប្រឹក្សា​អភិវឌ្ឍន៍កម្ពុជា ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និង​សហ​ប្រតិបត្តិការអន្តរជាតិ ព្រមទាំង រដ្ឋមន្ត្រី មន្ត្រីសំខាន់ៗនៃរាជរដ្ឋាភិបាល និងតំណាង​ពី​សភា​ពាណិជ្ជកម្ម​កម្ពុជា។

ក្នុងឱកាសនៃទស្សនកិច្ចនេះសម្តេចធិបតី នឹងមានជំនួបទ្វេភាគីជាមួយ ឯកឧត្តម ប្រធានាធិបតី យួន សកយ៉ល ពិភាក្សាស៊ីជម្រៅនូវភាពជាដៃគូ និងពង្រីកកិច្ចសហប្រតិបត្តិការ ពហុវិស័យ ដើម្បី​លើក​កម្ពស់ទំនាក់ទំនងនៃប្រទេសទាំងពីរឱ្យឈានទៅកម្រិតថ្មី។ ថ្នាក់ដឹកនាំទាំងពីរ នឹងអញ្ជើញ​ធ្វើ​ជា​អធិបតីដ៏ខ្ពង់ខ្ពស់ក្នុងពិធីចុះហត្ថលេខាលើឯកសារមួយចំនួនពាក់ព័ន្ធនឹងការអភិវឌ្ឍ សេដ្ឋកិច្ច និងហេដ្ឋារចនាសម្ព័ន្ធ។

សម្តេចធិបតីនាយករដ្ឋមន្ត្រី ក៏នឹងមានជំនួបដាច់ដោយឡែកជាមួយ ឯកឧត្តមនាយករដ្ឋមន្ត្រី ហាន់ ដុកស៊ូ (Han Duck-soo) និង ឯកឧត្តមប្រធានរដ្ឋសភា គីម ជីនផ្សំ (Kim Jin-pyo)។ សម្តេចធិបតីក៏នឹងអញ្ជើញចូលរួមក្នុងវេទិកាធុរកិច្ចកម្ពុជា-សាធារណរដ្ឋកូរ៉េ និងជួបជា​មួយ​ក្រុមហ៊ុន កូរ៉េសំខាន់ៗមួយចំនួន ហើយនឹងជួ​ប​សំណេះ​សំណាល​ជាមួយ​សហគមន៍ខ្មែរ​នៅ​សាធារណរដ្ឋ​កូរ៉េ ផងដែរ៕ អត្ថបទ៖ វ៉ន ដារ៉ា