យោងតាមទិន្នន័យរបស់ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា គិតត្រឹម​បំណាច់​ឆ្នាំ​២០២៣ រាជរដ្ឋាភិបាលកម្ពុជា បានផ្តល់ឱកាសការងារ​នៅក្រៅ​ប្រទេស​ជូន​ប្រជាពលរដ្ឋ​បាន​ចំនួន​សរុប​ជាង ១,៣ លាននាក់ និងបានផ្ញើប្រាក់មកគ្រួសារពីគ្រប់ប្រទេសជាមធ្យម ចំនួន​ប្រមាណ​ជិត ៣ពាន់លានដុល្លារអាម៉េរិកក្នុងមួយឆ្នាំ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បាន​ឲ្យ​ព័ត៌មាន ប៊ីធីវី ដឹងនៅយប់ថ្ងៃទី១៣ ឧសភា ឆ្នាំ២០២៤នេះថា ក្នុងចំនួន​ការងារ​ដែល​ប្រជា​ពលរដ្ឋខ្មែរកំពុងរស់នៅ និងធ្វើការក្រៅប្រទេសជាង ១,៣លាននាក់ ក្នុងនោះ ប្រទេសថៃ មាន​ចំ​នួនជាង ១,២លាននាក់ , សាធារណរដ្ឋកូរ៉េ ចំនួនជាង ៥ម៉ឺននាក់ , ប្រទេសជប៉ុន ចំនួន​ជាង ២ម៉ឺននាក់ , ប្រទេសម៉ាឡេស៊ី ចំនួនជាង ២ម៉ឺននាក់ , ប្រទេសសិង្ហបុរី ចំនួន ៨៧១នាក់ , តំបន់រដ្ឋបាលពិសេសហុងកុង ចំនួន ២១៨នាក់ និងព្រះរាជាណាចក្រអារ៉ាប់ប៊ីសាអូឌីត ចំនួន ៦៤នាក់។

បើតាមរបាយការណ៍របស់ក្រសួងការងារ ពលករដែលធ្វើការនៅប្រទេសថៃ ជា​មធ្យម​ទទួ​​ល​បាន​ប្រាក់​ខែ​ប្រមាណ ៤០០ដុល្លារ ក្នុង១ខែ , ម៉ាឡេស៊ី ទទួលបានប្រាក់ខែ ៣៤០ដុល្លារ , អារ៉ាប៊ី​សាអូឌីត ទទួលបានប្រាក់ខែ ៤០០ដុល្លារ , ជប៉ុន ទទួលបានប្រាក់ខែ ១,៤០០ដុល្លារ , សិង្ហបុរី ទទួល​បានប្រាក់ខែ ៥០០ដុល្លារ , កូរ៉េខាងត្បូង ទទួលបានប្រាក់ខែ ១,៥០០ដុល្លារ និងតំបន់​សេដ្ឋកិច្ច​ពិសេសហុងកុង ទទួលបានប្រាក់ខែ ៥៩១ដុល្លារ ក្នុង១ខែ ហើយពលករទាំងអស់ ទទួល​បាននូវអត្ថប្រយោជន៍ផ្សេងៗ តាមច្បាប់ នៃប្រទេសទទួលនីមួយៗ រួមទាំងប្រាក់ឈ្នួល និង​របប​សន្តិសុខសង្គម និងបានផ្ញើប្រាក់មកគ្រួសារពីគ្រប់ប្រទេសជាមធ្យម មានប្រមាណជាង ២,៩​ពាន់​លាន​ដុល្លារអាម៉េរិក ក្នុងមួយឆ្នាំៗ៕ អត្ថបទ៖ ឈិត បូរ៉ាវី