ប្រជាពលរដ្ឋចំនួនចំនួន៤ឃុំ ដែលស្មើនឹង៦៤គ្រួសារ នៅស្រុកពួក ខេត្ដសៀមរាប ដែល​រង​គ្រោះ​ដោយ​ខ្សល់​កន្ដ្រាក់ និងរន្ទះបាញ់ បានទទួលអំណោយពីសាខាកាកបាទក្រហម ខេត្ដសៀមរាប ។ ពិធី​ទទួល​អំណោយនេះ ធ្វើឡើងកាលពីថ្ងៃទី១៣ ខែឧសភាឆ្នាំ២០២៤ ស្ថិតនៅវត្ដព្រះអង្គទ្រង់ ស្រុកពួក​។

ប្រជាពលរដ្ឋរងគ្រោះដោយធម្មជាតិមកពី៤ឃុំនោះ រួមមាន ឃុំរើល ឃុំពួក ឃុំដូនកែវ និងឃុំ​សំរោង​យា ដោយមានរលំផ្ទះចំនួន១២ខ្នង និងរបើកដំបូលចំនួន៥០ខ្នង រន្ទះបាញ់ស្លាប់ ១នាក់ និង​របួស១នាក់)ដែលបានកើតឡើងកាលពីរសៀលថ្ងៃទី ៥ ខែឧសភា ឆ្នាំ២០២៤កន្លងទៅ។

ឯកឧត្តម គុជ លីនា អនុប្រធានអចិន្ត្រៃគណៈកម្មាធិការសាខាកាកបាទក្រហមកម្ពុជា ខេត្ត​សៀមរាប មានប្រសាសន៍ពាំនាំនូវការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ដែល​មិន​បាន​ទៅ​សំណេះសំណាល និងសួរសុខទុក្ខប្រជាពលរដ្ឋដោយសារលោកជាប់ភារកិច្ច ប៉ុន្ដែជានិច្ចកាល​លោក​បាន​យកចិត្តទុកដាក់ខ្ពស់ ចំពោះសុខទុក្ខប្រជាពលរដ្ឋរងគ្រោះ និងងាយរងគ្រោះគ្រប់រូប ដោយ​មិន​ប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ឯកឧត្តមបន្តថា បន្ទាប់ពីទទួលបានព័ត៌មាននេះ ឯកឧត្តម ប្រាក់ សោភ័ណ ប្រធាន​គណៈកម្មាធិការ​សាខាកាកបាទក្រហមកម្ពុជា ខេត្តសៀមរាប បានចាត់ក្រុមការងារ ដើម្បីចុះ​ពិនិត្យ​ជា​បន្តបន្ទាប់ និងរៀបចំអំណោយមនុស្សធម៌ជូនបងប្អូន នាពេលនេះ។ ឯកឧត្តម​បាន​បន្ត​ថា អំណោយមនុស្សធម៌ដែលបាននាំយកមកចែកជូននាពេលនេះ អាចជួយ​សម្រាល​ទុក្ខ​លំបាក​របស់​បងប្អូន​បានមួយកម្រិត ហើយក៏ជាការបង្ហាញ​នូវ​ការ​យក​ចិត្ត​ទុក​ដាក់​ចំពោះ​ប្រជាពលរ​ដ្ឋ​គ្រប់​រូប​ពី​សំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់​គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមាន​កាក​បាទ​ក្រហម​កម្ពុជា”។ ឯកឧត្តមក៏បានផ្ដាំផ្ញើដល់ប្រជាពលរដ្ឋទាំងអស់ សូមមេត្តាថែទាំសុខភាព​ឱ្យ​បាន​ល្អ ពិសេសកូនចៅតូចៗត្រូវប្រុងប្រយ័ត្ន ខ្លាចក្រែងជួបវិបត្តិផ្សេងៗ ព្រោះដើម​រដូវ​វស្សា​បាន​មក​ដល់​ហើយ​។ ម្យ៉ាងវិញទៀត បើឃើសភាពមិនស្រួលត្រូវប្រញាប់ទៅមណ្ឌលសុខភាព ឬមន្ទីរពេល​ដែល​នៅ​ជិតបំផុត ដើម្បីអាចពិគ្រោះ ឬព្យាបាលបានទាន់ពេលវេលា។

សូមបញ្ជាក់ថា មកដល់ថ្ងៃទី១៤ខែឧសភាឆ្នាំ២០២៤នេះ ប្រជាពលរដ្ឋនៅ​ចំនួន​១៧៥​គ្រួសារ​ដែល​រ​ង​គ្រោះដោយធម្មជាតិ នៅក្រុងរុនតាឯកតេជោសែនចំនួន៩៩គ្រួសារ ស្រុកអង្គរ​ធំ​ចំនួន​១២​គ្រួសារ និងស្រុកពួកចំនួន៦៤គ្រួសារ បានទទួល​អំណោយ​មនុស្សធម៌​ពី​សាខា​កាក​បាទ​ក្រហម​កម្ពុជា​ខេត្ដ​សៀមរាប។អំណោយមនុស្សធម៌ដែលបានផ្ដល់ជូន រួមមាន មុង ភួយ សារុង ក្រមា កន្ទេល អង្ករ ស័ង្កសី និងថវិកាព្រមទាំងគ្រឿងឧបភោគ បរិភោគជាច្រើនទៀត៕