​បាល់ទាត់៖ ​ខ្សែប្រយុទ្ធ​អង់គ្លេស Harry Kane ដែលជា​គោលដៅ​របស់​ក្រុម​ជើងឯក Premier League, Manchester City នោះបាន​អវត្តមាន​ពី​ការហ្វឹកហាត់​លើកដំបូង​ជាមួយ Tottenham Hotspur ត្រៀម​រដូវ​កាល​ថ្មី​។

​​កីឡាករ​វ័យ ២៨ឆ្នាំ​រូបនេះ​ក៏ដូចជា​កីឡាករ​ដទៃទៀត​របស់ Spurs មាន​កាលវិភាគ​ត្រូវធ្វើ​តេស្ត​រក​មេរោគ Covid-19 នៅ​ថ្ងៃ​ចន្ទ​ម្សិលមិញ មុនពេល​ប្រមូលផ្តុំ​ហ្វឹកហាត់​នៅថ្ងៃនេះ​។ ​Harry Kane បាន​សម្រាក​រយៈពេល ៣សប្តាហ៍​មកហើយ​ តាំងពី​បញ្ចប់​បេសកកម្ម​ជាមួយ​ក្រុម​ជំរើសជាតិ​អង់គ្លេស​នៅ Euro ២០២០​។​ ​មិនមាន​ការបញ្ជា​ក់ណា​មួយ​ពី Spurs ឡើយ​ពី​អវត្តមាន​របស់​កីឡាករ​វ័យ ២៨ឆ្នាំ​រូបនេះ​។ ​ប្រកួត​ចុងក្រោយ​នៅ English Premier League រដូវ​កាល​មុន Harry Kane បាន​ដើរ​ទះដៃ​មួយ​ជុំ​ទីលាន​ទៅកាន់អ្នកគាំទ្រ​ ដែល​ទំនងជា​ការ​លា​អ្នកគាំទ្រ​។ ​Harry Kane ត្រូវបាន​គេ​ដឹងថា​បាន​ជួប​ជាមួយ​ប្រធាន​ក្លិប Spurs លោក Daniel Levy ពី​ការចាកចេញ​នៅ​រដូវក្តៅ​នេះ​។​

​​Harry Kane មាន​កិច្ចសន្យា​ជាមួយ Spurs រហូតដល់​ឆ្នាំ២០២៤ បន្ទាប់ពី​ចុះកិច្ចសន្យា​ចុងក្រោយ ៦ឆ្នាំ​កាលពី​ឆ្នាំ២០១៨​។ ​រដូវ​កាល​មុន Kane រកបាន ២៣គ្រាប់​នៅ English Premier League ឈ្នះ​ស្បែកជើង​មាស​ជា​លើក​ទី៣​។ ​សរុប​គ្រាប់​បាល់​ជាមួយ Spurs, Harry Kane រកបាន ២២១គ្រាប់ ​ដែល​ចំនួន​នេះ​គេ​បាន​ក្លាយជា​អ្នក​ស៊ុត​បញ្ចូល​ទី​ ច្រើនជាងគេ​លំដាប់​ទី២ នៅ Spurs បន្ទាប់ពី Jimmy Greaves ដែល​រកបាន ២៦៦គ្រាប់​ចន្លោះ​ឆ្នាំ១៩៦១-១៩៧០៕

​អត្ថបទ​៖​នាង សុភា​វុ​ធ