នៅថ្ងៃទី១៥ ខែឧសភា សែ្អកនេះ តាមបណ្តាសាលាបណ្តុះបណ្តាលជំនាញវិជ្ជាជីវៈ (TVET) មួយ​ចំនួន ដែលអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសថ្នាក់អាហារូបករណ៍ ជូន​យុវជ​ន១លាន៥សែននាក់ ដំណាក់កាលទី១ នឹង​បើកការ​ប្រឡង​បញ្ចប់​វគ្គ​យក​វិញ្ញាបនបត្រ​C1 ក្រោយពីបណ្តាក្រុមយុវជនបានរៀនជំនាញចំនួន៤ខែរួចហើយមក។

ក្រុមយុវជននៃវិទ្យាស្ថានបច្ចេកទេស JVC បានថ្លែងប្រាប់BTV ថា នៅថ្ងៃម្សិលមិញនេះ គឺជាថ្ងៃ​រៀន​ចុង​ក្រោយ នៃកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស​ថ្នាក់​អាហារូបករណ៍​របស់​រាជ​រដ្ឋាភិបាល ផ្តល់ជូនយុវជនមកពីគ្រួសារក្រីក្រ និងគ្រួសារ​ងាយរ​ង​ហានីភ័យ​ចំនួន​១.៥​លាន​នាក់​ដំណាក់​កាលទី១ ហើយនៅពេលនេះយើងទាំង​អស់គ្នាក៏កំពុង​ខំប្រឹងរៀនត្រៀម​ចូលរួម​ប្រឡង​​បញ្ចប់វគ្គ យកវិញ្ញាបនបត្រជំនាញវិជ្ជាជីវៈកម្រិត១ C1 នៅថ្ងៃទី១៥ ខែឧសភា ឆ្នាំ២០២៤​ស្អែក​នេះ ដើម្បីយកវិញ្ញាបនបត្រនេះយកទៅប្រើប្រាស់ ស្វែងរកការងារឆាប់បានធ្វើផង ក៏​ដូច​យក​វិញ្ញាបនបត្រC1ទៅបញ្ជាក់ដើម្បីបានឱកាសរៀនបន្តនូវកម្រិត C2 , C3 និងC4 បន្តទៀត​ដើម្បីប​ង្កើន​កម្រិត​ចំណេះដឹងជំនាញរបស់គេឲ្យកាន់ខ្លាំងក្លាទៀត។

លោក ស៊ឹម សុរិន្ទ នាយកវិទ្យាស្ថានបច្ចេកទេស JVC បានឱ្យដឹងថា ថ្ងៃទី១៥ ខែឧសភានេះ វិទ្យាស្ថាន​JVC នឹងបើកប្រឡងបញ្ចប់វគ្គបណ្តុះបណ្តាលជំនាញវិជ្ជាជីវៈ បច្ចេកទេសកម្រិត១ ក្រោយ​ពី​ក្រុមយុវជនបានចូលរួមសិក្សាតាមមុខវិជ្ជាបានពេញលេញ ក្នុងរយៈពេល៤ខែរួចមក ហើយ​ក្រោយ​ពីប្រឡងរួចហើយ​សាលា​នឹង​បញ្ជូន​ក្រុមយុវជន​ទាំង​អស់​នោះ​ទៅ​ធ្វើ​ការងារ​ហាត់​ការ​នៅ​តាម​យានដ្ឋាន និងក្រុមហ៊ុនជាដៃគូ ដែលនេះជាឱកាស​ដ៏​ល្អ​របស់​យុវជន​នឹង​ទទួល​បា​ន​ការងារ​យូរ​អង្វែង នៅពេលយុវជនមានជំនាញច្បាស់លាស់។

តាមការឲ្យដឹងពីក្រសួងការងារ និងបណ្តុះបណ្តាលវិជ្ជាជីវៈ កម្មវិធី​ផ្តល់​អាហារូបករណ៍​របស់​រាជ​រដ្ឋាភិបាល សម្រាប់ការបណ្តុះបណ្តាលជំនាញវិជ្ជាជីវៈ ជូនយុវជនមកពីគ្រួសារក្រីក្រ និងគ្រួសារ​ងាយរង​ហានីភ័យ ១លាន៥សែននាក់ដំណាក់កាលទី១បានចាប់ផ្តើមបើកវគ្គដំបូង នៅអំឡុង​ពាក់​កណ្តាល​ខែមករា ឆ្នាំ២០២៤ មានយុវជនចុះឈ្មោះ និងចូលរៀន​ជំនាញ​នៅ​ក្នុង​ថ្នាក់​ជាក់​ស្តែង មានចំនួនជាង១៦៥០០នាក់ ហើយសម្រាប់យុវជនមកពីគ្រួសារក្រីក្រ និងងាយរង​ហានីភ័យ គឺបានទទួលប្រាក់ឧបត្ថម្ភក្នុង១ខែ២៨ម៉ឺនរៀលផងដែរ៕ អត្ថបទ៖ ស៊ុម សុខជា