ការប្រឡងសិស្សពូកែទូទាំងប្រទេស សម្រាប់សិស្សថ្នាក់ទី ៩និងថ្នាក់ទី ១២ បានឈាន​ដល់​ថ្ងៃ​ចុង​ក្រោយ នៅថ្ងៃទី ១៤ ខែឧសភា ឆ្នាំ ២០២៤នេះ ខណៈការប្រឡងនៅថ្ងៃចុងក្រោយនេះ មាន​រយៈពេល ២ម៉ោង ដោយបេក្ខជនគ្រប់រូប ត្រូវប្រឡងលើវិញ្ញាសា វប្បធម៌ទូទៅ។

ការប្រឡងសិស្សពូកែថ្នាក់ទី៩ និងថ្នាក់ទី ១២ ទូទាំងប្រទេស លើមុខវិជ្ជាអក្សរសិល្ប៍ខ្មែរ គណិត​វិទ្យា និងរូបវិទ្យា បានឈានដល់ថ្ងៃចុងក្រោយនៅថ្ងៃទី ១៤ ខែឧសភា ឆ្នាំ ២០២៤នេះ។ ការប្រឡង​សិស្សពូកែទូទាំងប្រទេសនៅឆ្នាំ ២០២៤នេះ គឺមានបេក្ខជនសរុបចំនួន ២៤០រូប ក្នុង​នោះ​បេក្ខនារីចំនួន ១២៧រូប។

ការប្រឡងនៅថ្ងៃទី ១ ជាការប្រឡងលើមុខវិជ្ជាឯកទេសទាំង ៣ គឺមុខវិជ្ជាអក្សរសិល្ប៍ខ្មែរ គណិត​វិទ្យា និងរូបវិទ្យា ក្នុងរយៈពេល ៣ម៉ោង។ រីឯការប្រឡងនៅថ្ងៃទី ២ ជាថ្ងៃចុងក្រោយ គឺ ប្រឡង​លើ​វិញ្ញាសា​វប្បធម៌ទូទៅ ដែលមានរយៈពេលចំនួន ២ម៉ោង។

សម្រាប់បេក្ខ​ជនមុនចូលរួមប្រឡងនៅថ្ងៃចុងក្រោយនេះ ពួកគេបានលើកឡើង​ពី​ការ​យល់​ឃើញ​ថា​វិញ្ញាសា​ឯកទេសកាលពីម្សិលម៉ិញ គឺមានកម្រិតស្តង់ដា​ដែល​សម​ស្រប​ក្នុង​ការ​ជ្រើសរើស​សិស្ស​ពូកែ​។ អ្នកខ្លះអាចបញ្ចប់កិច្ចការទាន់ពេលវេលា រីឯអ្នកខ្លះមិន​អាច​បង្ហើយ​កិច្ច​ការ​បាន​ទាំងអស់​នោះទេ​។ សម្រាប់ការប្រឡងលើវិញ្ញាសាវប្បធម៌ទូទៅនៅថ្ងៃចុងក្រោយនេះវិញ ពួកគេម្នាក់ៗ​នឹង​បន្ត​ការ​ប្រឹងប្រែងធ្វើឱ្យអស់ពីសមត្ថភាព ស្របពេលដែល​ពួកគេ​បាន​ត្រៀម​ខ្លួន​ជា​ច្រើន​លើ​វិញ្ញាសា​នេះ​ផង​ដែរ។

សម្រាប់ការប្រឡងសិស្សពូកែនេះ ក៏មានវត្តមានអាណាព្យាបាលធ្វើដំណើរពីបណ្ដាខេត្ត មករាជ​ធានី​ភ្នំពេញ ដើម្បីលើកចិត្តកូនផងដែរ។ ជាក់ស្ដែងគឺអាណាព្យាបាលរង់ចាំនៅខាងក្រៅ មណ្ឌល​ប្រឡង នៅពេលដែលកូនចូលទៅប្រឡង។ ពួកគេសប្បាយ​ចិត្តជាខ្លាំ​ង​ដែល​កូន​ប្រឹង​ប្រែង​រៀន​សូត្រ ហើយក៏សូមជូនពរកូនឱ្យជោគជ័យក្នុងការប្រឡងសិស្សពូកែទូទាំងប្រទេសនេះផងដែរ។

សូមជម្រាបថា សម្រាប់ការប្រឡងសិស្សពូកែទូទាំងប្រទេសនេះ នឹងប្រកាសលទ្ធផល និង​ប្រគល់​រង្វាន់​ជ័យ​លាភី​ជូនសិស្សពូកែ នៅថ្ងៃទី ១៦ ខែ ឧសភា ឆ្នាំ ២០២៤ខាងមុខ៕ អត្ថបទ៖ គឹមហុក