ព្រះសីហនុ ៖ ដើម្បីអបអរសាទរទិវាអន្ដរជាតិប្រយុទ្ធប្រឆាំងគ្រឿងញឿន ថ្ងៃទី២៦ ខែមិថុនា ឆ្នាំ២០២១ ក្រោមប្រធានបទ “គ្មានគ្រឿងញៀន និងគ្មានជំងឺកូវីដ-១៩ សហគមន៍មានសុវត្ថិភាព និងការអភិវឌ្ឍន៍” នៅថ្ងៃទី៣ ខែសីហា ឆ្នាំ២០២១ នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿង និងរដ្ឋបាលខេត្ដទាំងបី (ខេត្ដព្រះសីហនុ កំពត និងខេត្តកែប) ព្រមទាំងព្រះរាជអាជ្ញាអមសាលាដំបូងខេត្តព្រះសីហនុ ស្ថាប័ន អង្គភាពពាំក់ព័ន្ធជុំវិញខេត្ដ បានរៀបចំពិដុតបំផ្លាញចោលវត្ថុតាងសារធាតុញៀន ៤៦៨គីឡូក្រាម នៅស្ថិតភូមិ១ សង្កាត់លេខ១ ក្រុង-ខេត្ដព្រះសីហនុ។

នៅក្នុងឱសាសនោះ ឯកឧត្ដម សៀង សុខ ព្រះរាជអាជ្ញា នៃអយ្យការអមសាលាដំបូងខេត្តព្រះសីហនុ បានឱ្យដឹងថា វត្ថុតាងសារធាតុញៀន ៤៦៨គីឡូក្រាម ដែលរួមមានប្រភេទ៖ “មេតំហ្វេតាមីន ម៉ាទឹកកក (ICE) មេតំហ្វេតាមីន (WY) កេតាមីន (K) ម្យៅចម្រុះពណ៌ (MDMA) និងកញ្ឆាបរី និងថ្នាំបន្ទះ” នៃសំណុំរឿងចំនួន ២១៥កររណី ដែលមន្ត្រីជំនាញបានដុតបំផ្លាញនាពេលនេះ គឺបង្រ្កាបបានពីបទល្មើសកាលពីឆ្នាំ២០២០ នៅក្នុងភូមិសាស្ត្រខេត្តចំនួន៣ គឺខេត្តព្រះសីហនុ កំពត និងខេត្តកែប។ ការដុតបំផ្លាញវត្ថុតាងសារធាតុញៀននាពេលនេះ គឺជាសារឆ្លើយតប ព្រមទាំងជាសកម្មភាពដែលបង្ហាញឱ្យសារធារណជនទូទៅបានឃើញនិងដឹងថា វត្ថុតាងគ្រឿងញៀនទាំងនេះ ដែលបង្កហានិភ័យនាំឱ្យមានភាពអន្តរាយដក់មនុស្ស និងសង្គមជាតិ ត្រូវបានគណៈកម្មការដុតបំផ្លាញចោល។

លោក បន្ដថា ប្រទេសកម្ពុជា កំពុងប្រឈមនឹងគ្រោះថ្នាក់ធ្ងន់ធ្ងរបណ្តាលមកពីការឆ្លងរីករាលដាលជំងឺកូវីដ-១៩ ពិតមែន ក៍មិនអាចរារាំងកិច្ចប្រតិបត្តិការប្រយុទ្ធប្រឆាំងគ្រឿងញៀនទូទាំងប្រទេសបានឡើយ តែវា គ្រាន់តែបង្កឱ្យមានផលវិបាកមួយចំនួនក្នុងការបង្ក្រាបបទល្មើសនេះផងដែរ។ ដោយឡែក រឿងបញ្ហាជំងឺកូវីដ-១៩នេះ មានសភាពរីករាលដាលខ្លាំងក្លា តែវាអាចទៅដល់ទីបញ្ចប់នៅថ្ងៃណាមួយ ផ្ទុយទៅវិញបញ្ហាគ្រឿងញៀននេះ នឹងមិនងាយរកទីបញ្ចប់ឡើយ។ បរិមាណគ្រឿងញៀនដ៏ច្រើនសន្ធឹកសន្ធាប់ ប្រសិនបើសមត្ថកិច្ច បង្រ្កាបមិនទាន់ពេលវេលានោះទេ វា នឹងពង្វក់ស្មារតីអូសទាញដល់ប្រជាពលរដ្ឋស្លូតត្រង់ ជាពិសេសយុវជនឱ្យប្រើប្រាស់ដោយខុសច្បាប់ បណ្តាលឱ្យខូចសុខភាព និងឈានរហូតដល់ប្រព្រឹត្តបទល្មើសជាអាទិ៍ អំពើឃាតកម្ម និងឧក្រិដ្ឋកម្ម បង្កភាពអសន្តិសុខក្នុងសហគមន៍ ទូទាំងប្រទេសកម្ពុជា។

សូមបញ្ជាក់ថា ក្នុងរយៈពេល ៦ខែ ក្នុងឆ្នាំ២០២១នេះ សមត្ថកិច្ច បានប្រតិបត្តិការបង្ក្រាបបទល្មើសគ្រឿងញៀនបានចំនួនជាង ៣ពាន់ករណី ឃាត់ខ្លួនជនសង្ស័យជាង ៧ពាន់នាក់ និងចាប់យកគ្រឿងញៀនបានសរុបជាង ៨៥០គីឡូក្រាម៕ ដោយ៖ ប៊ុនថា