សហរដ្ឋអាមេរិកកាលពីថ្ងៃចន្ទ បានអំពាវនាវឲ្យអ៊ីរ៉ង់បញ្ឈប់បញ្ជូនចំនួនមិនធ្លាប់មានពីមុនមកនៃសព្វាវុធ របស់ខ្លួន ទៅឲ្យក្រុមឧទ្ទាមហ៊ួទីនៅប្រទេសយេម៉ែន ដោយអនុញ្ញាតឲ្យក្រុមយុទ្ធជនរបស់ខ្លួនធ្វើ «ការវាយប្រហារដោយខ្វះការពិចារណា» លើនាវា នៅសមុទ្រក្រហម និងកន្លែងផ្សេងទៀត។

ឯកអគ្គរដ្ឋទូតរងរបស់សហរដ្ឋអាមេរិក លោក Robert Wood បានប្រាប់ក្រុមប្រឹក្សាសន្តិសុខអង្គការសហប្រជាជាតិថា ប្រសិនបើខ្លួនចង់ធ្វើឲ្យមានការរីកចម្រើនឈានទៅរកការបញ្ចប់សង្គ្រាមស៊ីវិលក្នុងប្រទេសយេម៉ែននោះ យើងត្រូវតែធ្វើសកម្មភាពរួមគ្នា ដើម្បី «ឲ្យអ៊ីរ៉ង់បញ្ចប់តួនាទីបង្កអស្ថិរភាពរបស់ខ្លួន ហើយទទូចថា ខ្លួនមិនអាចលាក់ខ្លួននៅពីក្រោយក្រុមហ៊ួទីបានទេ»។

លោកបាននិយាយថា មានភ័ស្តុតាងយ៉ាងច្រើនដែលថា អ៊ីរ៉ង់កំពុងផ្តល់អាវុធទំនើបៗ រួមទាំងមីស៊ីលបាលិស្ទិក និងមីស៊ីលតម្រង់គោលដៅ ដល់ក្រុមហ៊ួទី ជាការរំលោភលើទណ្ឌកម្មរបស់អង្គការសហប្រជាជាតិ។

លោក Wood បាននិយាយថា៖«ដើម្បីបញ្ជាក់ពីការព្រួយបារម្ភរបស់ក្រុមប្រឹក្សាទាក់ទងនឹងការរំលោភដែលកំពុងបន្តរឹងបន្តឹងលើអាវុធ យើងត្រូវតែធ្វើបន្ថែមទៀត ដើម្បីពង្រឹងការអនុវត្ត និងទប់ស្កាត់អ្នករំលោភលើទណ្ឌកម្ម»។

ក្រុមហ៊ួទី និយាយថា ការវាយប្រហាររបស់ពួកគេលើការដឹកជញ្ជូន នៅសមុទ្រក្រហម និងឈូងសមុទ្រ Aden មានគោលបំណងដាក់សម្ពាធលើអ៊ីស្រាអែលឲ្យបញ្ចប់សង្គ្រាមរបស់ខ្លួនជាមួយក្រុមហាម៉ាស នៅតំបន់ហ្កាហ្សា ដែលបានសម្លាប់ជនជាតិប៉ាឡេស្ទីនជាង ៣៥.000នាក់ នៅទីនោះ។ សង្រ្គាម បានចាប់     ផ្តើម បន្ទាប់ពីក្រុមសកម្មប្រយុទ្ធដឹកនាំដោយក្រុមហាម៉ាស បានវាយប្រហារអ៊ីស្រាអែលកាលពីថ្ងៃទី៧ ខែតុលា ដោយបានសម្លាប់មនុស្ស ១.២០០នាក់ និងចាប់មនុស្សប្រហែល ២៥០នាក់ផ្សេងទៀត ធ្វើជាចំណាប់ថ្នូរ។

រដ្ឋបាលដែនសមុទ្រអាមេរិក បាននិយាយកាលពីចុងខែមុនថា ក្រុមហ៊ួទី បានបើកការវាយប្រហារជាង ៥០លើក ទៅលើការដឹកជញ្ជូន រឹបអូសយកនាវាមួយគ្រឿង និងបានពន្លិចនាវាមួយផ្សេងទៀត ចាប់តាំងពីខែ    វិច្ឆិកាមក។