អាជ្ញាធរ បាននិយាយនៅថ្ងៃអង្គារនេះ អាជ្ញាធររុស្ស៊ី បានចាប់ខ្លួនមន្ត្រីក្រសួងការពារជាតិជាន់ខ្ពស់ម្នាក់ទៀត ពីបទស៊ីសំណូក ប៉ុន្មានថ្ងៃបន្ទាប់ពីលោកប្រធានាធិបតី វ្ល៉ាឌីមៀ ពូទីន បានផ្លាស់ប្តូររដ្ឋមន្ត្រីការពារជាតិ នៅក្នុងការរុះរើគណៈរដ្ឋមន្ត្រី និងចំពេលមានការរំពឹងទុកនៃការបោសសម្អាតបន្ថែមទៀត នៅក្នុងក្រសួងនេះ។

គណៈកម្មាធិការស៊ើបអង្កេត ដែលជាស្ថាប័នអនុវត្តច្បាប់កំពូលរបស់រុស្ស៊ី បានសរសេរនៅក្នុងសេចក្តីថ្លែងការណ៍មួយថា លោកឧត្តមសេនីយ៍ឯក Yury Kuznetsov ដែលជាប្រធាននាយកដ្ឋានបុគ្គលិករបស់ក្រសួង ត្រូវបានចាប់ខ្លួន ក្រោមការចោទប្រកាន់ពីបទស៊ីសំណូក ហើយត្រូវបានឃុំរង់ចាំការស៊ើបអង្កេត និងការកាត់ក្តី។

សេចក្តីថ្លែងការណ៍នោះ បានបញ្ជាក់ថា លោកKuznetsov ត្រូវបានចោទប្រកាន់ពីបទទទួលយកសំណូកដ៏ពិសេសមួយ ជាការចោទប្រកាន់ដែលអាចត្រូវផ្តន្ទាទោសឲ្យជាប់ពន្ធនាគារ រហូតដល់ ១៥ឆ្នាំ។ គណៈកម្មាធិការស៊ើបអង្កេត បានរាយការណ៍ថា គេហដ្ឋានរបស់មន្ត្រីរូបនេះ និងទ្រព្យសម្បត្តិផ្សេងទៀត ត្រូវបានឆែកឆេរ ហើយអាជ្ញាធរ បានរឹបអូសកាក់មាស របស់ប្រណិតៗ និងប្រាក់ចំនួន ១០០លានរូប្លិ៍ (ត្រឹមតែជាង មួយលានដុល្លារ) ជាសាច់ប្រាក់។

លោកពូទីន បានជំនួសលោក Sergei Shoigu ជារដ្ឋមន្ត្រីការពារជាតិកាលពីថ្ងៃអាទិត្យ នៅក្នុងការរុះរើ    គណៈរដ្ឋមន្ត្រីដែលកើតឡើង នៅពេលដែលលោក ចាប់ផ្តើមអាណត្តិទី៥ របស់ខ្លួន ដោយផ្លាស់ប្តូរគាត់ទៅតំណែងថ្មីជាលេខាធិការក្រុមប្រឹក្សាសន្តិសុខរបស់រុស្ស៊ី។ លោក បានស្នើលោក Andrei Belousov មន្ត្រីសេដ្ឋកិច្ចកំពូលឲ្យឡើងកាន់តំណែង ជារដ្ឋមន្ត្រីការពារជាតិ។ មនុស្សជាច្រើនរំពឹងថាលោក Belousov នឹងធ្វើការបោសសម្អាតបន្ថែមទៀត។