រដ្ឋមន្ត្រីការបរទេសលោក Hakan Fidan នៅថ្ងៃអង្គារ (ទី១៤ ខែឧសភា) បាននិយាយថា ប្រទេសទួរគីបានសម្រេចចិត្តដាក់ស្នើសេចក្តីប្រកាសរបស់ខ្លួន អំពីការសុំធ្វើអន្តរាគមន៍ជាផ្លូវការក្នុងសំណុំរឿងប្រល័យពូជសាសន៍របស់អាហ្វ្រិកខាងត្បូងប្រឆាំងនឹងអ៊ីស្រាអែល នៅតុលាការយុត្តិធម៌អន្តរជាតិ (ICJ)។

គួរបញ្ជាក់ថា កាលពីដើមខែនេះ លោក Fidan បានប្រកាសពីការសម្រេចចូលរួមក្នុងសំណុំរឿង ដែលត្រូវបានលើកយកមកដោយអាហ្វ្រិកខាងត្បូង ខណៈដែលទីក្រុងអង់ការ៉ា បានបង្កើនវិធានការ ប្រឆាំងនឹងអ៊ីស្រាអែល ជុំវិញការវាយលុករបស់ប្រទេសនេះ លើតំបន់ហ្កាហ្សា ដែលបានសម្លាប់មនុស្សជាង ៣៥.០០០នាក់ និងដែលបានចាប់ផ្តើមឡើងបន្ទាប់ពីក្រុមសកម្មប្រយុទ្ធហាម៉ាស បានធ្វើការប្រហារយ៉ាងកំរោល កាលពីថ្ងៃទី៧ ខែតុលា។

នៅឯសន្និសីទកាសែតជាមួយសមភាគីអូទ្រីស លោក Fidan បានប្រាប់ថា៖ «យើងបានថ្កោលទោសជនស៊ីវិល ដែលត្រូវបានគេសម្លាប់នៅថ្ងៃទី៧ ខែតុលា»។

លោកបានបន្ថែមថា៖ «ប៉ុន្តែអ៊ីស្រាអែលដែលបានសម្លាប់ជនជាតិប៉ាឡេស្ទីនស្លូតត្រង់រាប់ពាន់នាក់ជាប្រព័ន្ធ និងដែលធ្វើឲ្យតំបន់លំនៅឋានទាំងមូល មិនអាចរស់នៅបាន គឺជាឧក្រិដ្ឋកម្មប្រឆាំងមនុស្សជាតិ ការប៉ុនប៉ងប្រល័យពូជសាសន៍ និងការបង្ហាញពីអំពើប្រល័យពូជសាសន៍»។

តែយ៉ាងណាក្ដី មន្ត្រីក្រសួងការបរទេសម្នាក់បាននិយាយថា ប្រទេសទួរគីមិនទាន់បានដាក់ពាក្យស្នើសុំជាផ្លូវការទៅកាន់ ICJ នៅឡើយទេ៕