ក្រុមមន្ត្រីក្នុងតំបន់បាននិយាយកាលពីថ្ងៃអង្គារទី១៤ ខែឧសភាថា ចំហេះព្រៃដ៏ធំមួយកំពុងឆាបឆេះរាលដាលចូលទៅកាន់តែជិតទីក្រុងហ្វត ម៉ាកម៉ូរ៉េ (Fort McMurray)ដែលជាទីក្រុងវាលខ្សាច់ផលិតប្រេងដ៏សំខាន់របស់ប្រទេសកាណាដា ហើយមនុស្សប្រហែល ៦.០០០នាក់ ក្នុងតំបន់ជាយក្រុងចំនួន៤ ត្រូវបានប្រាប់ឱ្យជម្លៀសចេញពីលំនៅឋាន។

ភ្លើងឆេះព្រៃ ដែលបង្កឡើងដោយលក្ខខណ្ឌអាកាសធាតុស្ងួតល្មមងាយនឹងបង្កការឆាបឆេះ និងខ្យល់បក់ខ្លាំង បាននិងកំពុងគំរាមកំហែងទីក្រុងនៅក្នុងខេត្ត អាល់ប៊ើតា (Alberta) ភាគខាងលិច តាំងពីសប្តាហ៍មុនមក។ ឥឡូវនេះអណ្ដាតភ្លើងបានឆេះរាលដាលចម្ងាយប្រហែល ១៣ គីឡូម៉ែត្រទៅភាគនិរតី។

មន្ត្រីផ្នែកព័ត៌មានអំពីភ្លើងឆេះព្រៃ ខេត្ត Alberta លោកស្រី ចូស៊ី សេនអ៊ុនហ្គេ (Josee St-Onge) បាននិយាយថា អណ្ដាតភ្លើងបានឆាបឆេះកាន់តែខ្លាំងកាលពីថ្ងៃទី ១៤ ខែឧសភា ហើយបានកត់សម្គាល់ឃើញថា មានខ្យល់បក់មកពីភាគនិរតី មកក្នុងល្បឿន ៤០ គីឡូម៉ែត្រក្នុងមួយម៉ោង។

លោកស្រីបានប្រាប់សន្និសីទសារព័ត៌មានតាមអ៊ីនធឺណិតថា គួរឲ្យស្ដាយណាស់ ខ្យល់នេះពុំមែនជាខ្យល់អំណោយផលសម្រាប់យើងទេ ហើយកម្លាំងភ្លើងនឹងបន្តរាលដាលឆ្ពោះទៅទីក្រុង នេះរហូតដល់យើងមើលឃើញមានការប្រែប្រួលនៃកម្លាំងខ្យល់ណាមួយ។

ក្រុមមន្ត្រីបាននិយាយថា ចំហេះព្រៃនេះ បានឆេះរាលដាលក្នុងវិសាលភាពយ៉ាងធំហើយមកដល់ពេលនេះ មានទំហំជាង ១ ម៉ឺនហិចតា៕