ស៊ីហ្គេម៖ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់ថា ភាគីចិននឹងប្រគល់កីឡដ្ឋាននៃពហុកីឡដ្ឋានជាតិមរតកតេជោ មកឲ្យភាគីកម្ពុជានាថ្ងៃទី១៥ ខែសីហា ឆ្នាំ២០២១ ខាងមុខនេះ បន្ទាប់ពីសំណង់ប្រវត្តិសាស្ត្រសម្រាប់ត្រៀមស្វាគមន៍ការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ បានសាងសង់រួចរាល់ជាស្ថាពរ។
រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) ដដែលបានបញ្ជាក់ថា បច្ចុប្បន្នការសាងសង់កីឡដ្ឋានធំនៃពហុកីឡដ្ឋានជាតិមរតកតេជោ មានគ្រប់លក្ខណៈ ១០០% ហើយ ពិសេសផ្នែកខាងក្នុងកីឡដ្ឋានក៏រួចរាល់ដែរ នៅតែការលើកតុបតែងផ្ទាំងសិលាចារពីសំណង់ប្រវត្តិសាស្ត្រនេះ ដែលបញ្ជាក់ពីមិត្តភាពកម្ពុជា-ចិនប៉ុណ្ណោះ។ ដូច្នេះតាមការគ្រោងទុកភាគីចិននឹងធ្វើការប្រគល់កីឡដ្ឋានធំនៃពហុកីឡដ្ឋានជាតិមរតកតេជោ មកដល់គណៈកម្មាធិការជាតិអូឡាំពិកកម្ពុជាដើម្បីថែរក្សាបន្ដ ក្រោមកិច្ចសហការជាមួយអ្នកជំនាញចិនក្នុងការសម្អាត អនាម័យ សណ្ដាប់ធ្នាប់ និងសន្តិសុខជាដើម ក្នុងមរតកដ៏មហាសាលនេះឲ្យក្លាយទៅជាកន្លែងដ៏ទាក់ទាញ និងក្លាយជានិមិត្តរូបថ្មីនៃរាជធានីភ្នំពេញ និងព្រះរាជាណាចក្រកកម្ពុជា សម្រាប់ត្រៀមរៀបចំព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ២០២៣។
គួរដឹងថា កីឡដ្ឋានធំនៃពហុកីឡដ្ឋានជាតិមរតកតេជោ បានបើកការដ្ឋានសាងសង់កាលពីថ្ងៃទី០៤ ខែមេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ដែលជាជំនួយឥតសំណងរបស់រដ្ឋាភិបាលសាធារណរដ្ឋប្រជាមានិតចិន និងប្រជាជនចិនក្នុងទំហំទឹកប្រាក់ប្រមាណ ១៦០លានដុល្លារ។ សមិទ្ធផលដ៏អស្ចារ្យនេះអាចផ្ទុកអ្នកទស្សនាបានជាង ៦ម៉ឺននាក់ ហើយអាចរំដោះមនុស្សពេលមានអាសន្នក្នុងរយៈពេល ៧នាទីប៉ុណ្ណោះ។ ពហុកីឡដ្ឋានជាតិមរតកតេជោគឺជាពហុកីឡដ្ឋានដ៏ទំនើបរបស់កម្ពុជា ដែលសាងសង់ឡើងត្រៀមធ្វើជាម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
