រថក្រោះអ៊ីស្រាអែល បានរុញច្រានកាន់តែជ្រៅចូលទៅក្នុងទីក្រុងរ៉ាហ្វា (Rafah) កាលពីថ្ងៃអង្គារ (១៤ ឧសភា) ដោយបានទៅដល់តំបន់លំនៅដ្ឋានមួយចំនួននៃទីក្រុងព្រំដែនហ្កាហ្សា ភាគ​ខាងត្បូង ដែលមនុស្សជាងមួយលាននាក់បានស្វែងរកទីជម្រក ខណៈកងកម្លាំងរបស់ខ្លួនក៏បាន​វាយលុក​ភាគខាងជើងនៃតំបន់ហ៊ុមព័ទ្ធនេះ ក្នុងការវាយប្រហារដ៏ខ្លាំងក្លាបំផុត​ក្នុងរយៈពេលជាច្រើនខែ។

សម្ព័ន្ធមិត្ត និងក្រុមផ្តល់ជំនួយអន្តរជាតិរបស់អ៊ីស្រាអែល បានព្រមានម្តងហើយម្តងទៀតប្រឆាំងនឹងការលុកលុយជើងគោកចូលទៅក្នុងទីក្រុងរ៉ាហ្វា ជាទីដែលប្រជាជនប៉ាឡេស្ទីនជាច្រើនបានភៀសខ្លួន ហើយអ៊ីស្រាអែលនិយាយថា កងវរសេនាតូចហាម៉ាស ចំនួនបួនកងបានលាក់ខ្លួន និងប្ដេជ្ញាកម្ចាត់អ្នកប្រយុទ្ធដែលនៅសេសសល់។

អ្នកនាំពាក្យកងកម្លាំងអ៊ីស្រាអែល លោកឧត្តមនាវីទោ ដានីញែល ហាហ្ការី (Daniel Hagari) បាននិយាយនៅក្នុងបទសម្ភាសន៍មួយថា កងកម្លាំងបានសម្លាប់យុទ្ធជនសកម្មប្រយុទ្ធប្រហែល ១០០ នាក់ ដែលមានទីតាំងនៅផ្លូវរូងក្រោមដីចំនួន ១០ និងបានរកឃើញអាវុធជាច្រើននៅក្នុងក្រុងរ៉ាហ្វា ចាប់តាំងពីការចាប់ផ្តើមប្រតិបត្តិការមួយសប្តាហ៍មុនមក។

ការប្រយុទ្ធបានកាន់តែខ្លាំងក្លានៅកន្លែងផ្សេងទៀតនៅទូទាំងតំបន់ហ្កាហ្សាស្ទ្រីប ក្នុងប៉ុន្មានថ្ងៃថ្មីៗនេះ រួមទាំងនៅភាគខាងជើង ដោយយោធាអ៊ីស្រាអែល ក៏បានវិលត្រឡប់ទៅកាន់តំបន់ដែលខ្លួនបានអះអាងថាបានកម្ចាត់ហាម៉ាស រួចហើយផងដែរ។ ប្រភពពីអ្នកស្រុក និងក្រុមសកម្មប្រយុទ្ធបាននិយាយថា ការប៉ះទង្គិចគ្នាកាលពីថ្ងៃអង្គារ នេះគឺបង្ហូរឈាមបំផុតក្នុងរយៈពេលជាច្រើនខែ៕