ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅក្នុងបទសម្ភាសន៍មួយដែលបានចេញផ្សាយនៅព្រឹកថ្ងៃពុធ (១៥ ឧសភា) នេះបាននិយាយថា លោកបានគាំទ្រផែនការរបស់ប្រទេសចិនសម្រាប់ការដោះស្រាយវិបត្តិអ៊ុយក្រែនដោយសន្តិវិធី ដោយនិយាយថាទីក្រុងប៉េកាំង មានការយល់ដឹងពេញលេញអំពីអ្វីដែលនៅពីក្រោយវិបត្តិនេះ។

លោក ពូទីន ដែលនិយាយទៅកាន់ទីភ្នាក់ងារសារព័ត៌មានស៊ីនហួរ (Xinhua) របស់ចិន នៅមុនដំណើរទស្សនកិច្ចរបស់លោកទៅកាន់ទីក្រុងប៉េកាំង ក្នុងសប្តាហ៍នេះ បាននិយាយថា ប្រទេសរុស្ស៊ី នៅតែបើកចំហសម្រាប់ការសន្ទនា និងការពិភាក្សាដើម្បីដោះស្រាយជម្លោះដែលមានរយៈពេលជាងពីរឆ្នាំ។ លោក ពូទីន បន្ថែមថា ផែនការរបស់ប្រទេសចិន និង «គោលការណ៍» បន្ថែមទៀតដែលបានបង្ហាញជាសាធារណៈដោយលោកប្រធានាធិបតី ស៊ី ជីនពីង (Xi Jinping) កាលពីខែមុន បានគិតគូរពីកត្តានៅពីក្រោយជម្លោះ។

ហើយគោលការណ៍បន្ថែមដែលកំណត់ដោយលោក ស៊ី ក្នុងកិច្ចពិភាក្សាជាមួយអធិការបតីអាល្លឺម៉ង់ លោក អូឡា សូល (Olaf Scholz) គឺជា «ជំហានជាក់ស្តែង និងស្ថាបនា» ដែល «បង្កើតគំនិតនៃភាពចាំបាច់ដើម្បីយកឈ្នះលើចិត្តគំនិតសង្រ្គាមត្រជាក់»។

ទីក្រុងប៉េកាំង បានដាក់ចេញនូវផែនការចំនួន ១២ ចំណុចកាលពីជាងមួយឆ្នាំមុន ដែលបានដាក់ចេញនូវគោលការណ៍ទូទៅសម្រាប់ការបញ្ចប់សង្រ្គាម ប៉ុន្តែមិនបានបញ្ជាក់ជាក់លាក់នោះទេ។ ផែនការនោះទទួលបានការស្វាគមន៍យ៉ាងកក់ក្តៅនៅពេលនោះទាំងនៅក្នុងប្រទេសរុស្ស៊ី និងអ៊ុយក្រែន ខណៈពេលដែលសហរដ្ឋអាមេរិក បាននិយាយថា ប្រទេសចិន កំពុងបង្ហាញខ្លួនឯងថាជាអ្នកបង្កើតសន្តិភាព ប៉ុន្តែឆ្លុះបញ្ចាំងពី «ការនិទានរឿងមិនពិត» របស់រុស្ស៊ី និងការបរាជ័យក្នុងការថ្កោលទោសការឈ្លានពានរបស់លោក ពូទីន៕