ក្រសួងបរិស្ថាន បានប្រកាសបើកយុទ្ធនាការ «កម្ពុជាស្អាត ខ្មែរធ្វើបាន» ចាប់ពីថ្ងៃទី១៥ ខែ​ឧសភា ឆ្នាំ២០២៤នេះតទៅ។ ពិធីនេះ ធ្វើឡើងក្រោមអធិបតីភាពឯកឧត្តមបណ្ឌិត អ៊ាង សុផ​ល្លែត​ រដ្ឋមន្រ្តីក្រសួងបរិស្ថាន ដែលមានការចូលរួមពីថ្នាក់ដឹកនាំក្រសួងបរិស្ថានជាច្រើនរូបទៀត ស្ថិត​នៅ​ទីស្តីការក្រសួងបរិស្ថាន រាជធានីភ្នំពេញ។

នៅក្នុងពិធី ឯកឧត្តមបណ្ឌិត អ៊ាង សុផល្លែត បានមានប្រសាសន៍ថា យុទ្ធនាការ «កម្ពុជាស្អាត ខ្មែរ​ធ្វើ​បាន»នេះ បានបង្ហាញយ៉ាងច្បាស់ពីការតាំងចិត្តចូលរួមពីខ្មែរទូទាំងប្រទេស បន្ទាប់​ពី​កម្ពុ​ជា​យើង​បាន​ចូលរួមទប់ស្កាត់ ការពារការប្រើប្រាស់ និងបោះចោលថង់ប្លាស្ទិកបានច្រើន ជាងការ​បោះ​ចោល​ទៅក្នុងទីសាធារណៈទទួលបានជោគជ័យរួចហើយ។

ឯកឧត្តមរដ្ឋមន្រ្តីបានបន្តថា យុទ្ធនាការ «កម្ពុជាស្អាត ខ្មែរធ្វើបាន» គឺជាយុទ្ធនាការសុំឱ្យ សិស្សា​នុ​សិស្ស បងប្អូនប្រជាពលរដ្ឋមួយភូមិ ឬមួយឃុំ ឬមួយស្រុក ឬមួយខេត្ត ចេញមក​ទាំង​អស់​គ្នា​រើស​សំរាម​ជុំវិញ​បរិវេណផ្ទះ សាលារៀន វត្តអារាម និងតាមទីសាធារណៈ ចំនួន១៥នាទី រៀងរាល់​ថ្ងៃ​សៅរ៍​ ដោយប្រមូលទុកដាក់សំរាមឱ្យបានត្រឹមត្រូវ។ ហើយយុទ្ធនាការនេះ មានបីជំហាន​រួមមាន​៖ ទី១.ធ្វើយុទ្ធនាការ ទី២.ចលនាប្រជាពលរដ្ឋ និងទី៣.ធ្វើជាទម្លាប់។

ឯកឧត្តមរដ្ឋមន្រ្តីមានប្រសាសន៍បន្តទៀតថា ភាពស្អាត និងសុខភាពប្រជាពលរដ្ឋ ជាការងារ​អាទិភាព ដែលរាជរដ្ឋាភិបាលកម្ពុជា នៅក្នុងអាណត្តិទី៧ បាននឹងកំពុងយកចិត្តទុកដាក់។ ការ​សម្អាត​អនាម័យបរិស្ថាននៅតាមមូលដ្ឋាន ប្រមូលទុកដាក់សំរាម រួមទាំង​ការ​កាត់​បន្ថយ​សំណល់​ប្លាស្ទិក ដែលឈានទៅបញ្ឈប់ការប្រើប្រាស់ប្លាស្ទិក ក្នុងចំណោមយុវជនជំនាន់ក្រោយ ធានា​ការ​គ្រប់​គ្រង​សំរាម ថែរក្សាអនាម័យបរិស្ថាន និង សុខុមាលភាពប្រជាពលរដ្ឋ បានល្អប្រសើរ ស្រប​នឹង​ភាព​ស្អាត ដែលជាមុំយុទ្ធសាស្រ្តអាទិភាពទី១ ចែងក្នុងយុទ្ធសាស្រ្តចក្រាវិស័យបរិស្ថាន។

គួរ​បញ្ជាក់ដែរថា ក្រសួងបរិស្ថានបានរៀបចំ «យុទ្ធសាស្រ្តចក្រាវិស័យបរិស្ថាន ឆ្នាំ២០២៣- ២​០២៨» ដែលផ្តោតលើមុំយុទ្ធសាស្រ្តចំនួន៣រួមមាន៖ ភាពស្អាត ភាពបៃតង និងចីរភាព ក្នុង​គោល​បំណង​តម្រ​ង់ទិស និងចង្អុលបង្ហាញការងារជាអាទិភាព ដើម្បីធានាឱ្យបាន​នូវ​ចីរភាព​បរិស្ថាន និងសុក្រឹតកម្មបរិស្ថានកិច្ច ឆ្លើយតបទៅនឹងការប្រែប្រួលអាកាសធាតុ និងលើក​កម្ពស់​សេដ្ឋកិច្ច​បៃតង៕ អត្ថបទ៖ទូច សោភ័ណ