ប្រមុខការបរទេសកោះតៃវ៉ាន់ លោក ចូសេប អ៊ូ (Joseph Wu) នៅពីថ្ងៃពុធ (១៥ ឧសភា) នេះ បានអំពាវនាវដល់អង្គការសុខភាពពិភពលោក WHO ឱ្យអនុញ្ញាតឱ្យកោះនេះចូលរួមកិច្ចប្រជុំទាំងអស់របស់ខ្លួន ប្រសិនបើស្ថានប័នពិភពលោកមួយនេះម៉ឺងម៉ាត់អំពីគោលដៅរបស់ខ្លួននៃ «សុខភាពសម្រាប់ទាំងអស់គ្នា» មុនពេលកិច្ចប្រជុំកំពូលដ៏សំខាន់មួយ ដែលក្រុងតៃប៉ិ ចង់ចូលរួម។

កោះតៃវ៉ាន់ ត្រូវបានដកចេញពីអង្គការអន្តរជាតិភាគច្រើនដោយសារតែការជំទាស់របស់ប្រទេសចិន ដែលចាត់ទុកកោះគ្រប់គ្រងតាមបែបប្រជាធិបតេយ្យនេះជាទឹកដីរបស់ខ្លួន។ សន្និបាតសុខភាពពិភពលោក (WHA) ឆ្នាំនេះចាប់ផ្តើមនៅថ្ងៃទី២៧ ខែឧសភា ត្រឹមតែមួយសប្តាហ៍បន្ទាប់ពីមេដឹកនាំជាប់ឆ្នោតថ្មីរបស់តៃវ៉ាន់ លោក ឡៃ ឈីងទឺ (Lai Ching-te) ដែលចិនចាត់ទុកថាជាអ្នកផ្ដាច់ខ្លួន ចូលកាន់តំណែង។

តៃវ៉ាន់ បានចូលរួមសន្និបាតសុខភាពពិភពលោក (WHA) នេះក្នុងនាមជាអ្នកសង្កេតការណ៍ពីឆ្នាំ២០០៩ ដល់ឆ្នាំ២០១៦ ក្រោមការគ្រប់គ្រងរបស់មេដឹកនាំនៅពេលនោះ គឺលោក ម៉ា អ៊ីងចូវ (Ma Ying-jeou) ដែលបានចុះហត្ថលេខាលើកិច្ចព្រមព្រៀងពាណិជ្ជកម្ម និងទេសចរណ៍សំខាន់ៗជាមួយប្រទេសចិន។ ប៉ុន្តែទីក្រុងប៉េកាំង បានចាប់ផ្តើមរារាំងការចូលរួមរបស់តៃវ៉ាន់នៅឆ្នាំ២០១៧ បន្ទាប់ពីមេដឹកនាំថ្មី លោកស្រី សៃ អ៊ីងវិន (Tsai Ing-wen) បានឈ្នះតំណែង។

ការិយាល័យកិច្ចការតៃវ៉ាន់ របស់ប្រទេសចិន បាននិយាយកាលពីថ្ងៃចន្ទថា វាជាកំហុសរបស់បក្សកាន់អំណាចរបស់តៃវ៉ាន់ ដែលកោះនេះមិនអាចចូលរួមសន្និបាត WHA ដោយសារអ្វីដែលខ្លួនហៅថា «កង្វះមូលដ្ឋាននយោបាយ» ប៉ុន្តែរដ្ឋាភិបាលកោះតៃវ៉ាន់និយាយថា ទីក្រុងប៉េកាំង ពុំមានសិទ្ធិនិយាយជំនួស ឬតំណាងឱ្យតៃវ៉ាន់ នៅលើឆាកអន្តរជាតិឡើយ៕