​បាល់ទាត់៖ ខ្សែប្រយុទ្ធ​ស្នូល​ក្លិប​​ព្រះខ័ន​រាជ​ស្វាយរៀង Jean Marie Privat កំពុង​ឈរ​កំពូល​តារាង​កីឡាករ​ស៊ុត​បញ្ចូល​ទី​ច្រើន​ជាង​គេ ​(Top-Scorers) គិត​ត្រឹម​សប្ដាហ៍​ទី​១១ នៃ​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​គ​ឆ្នាំ​២០២១ បន្ទាប់ពី​រក​បាន ១១​គ្រាប់ និង​រួមចំណែក​ជួយ​ក្រុម​ឈរ​លេខ​រៀង​ទី​៤ ក្នុង​តារាង​ពិន្ទុ​បណ្ដោះអាសន្ន។​

​បើ​ធៀប​ជាមួយ​បេក្ខភាព​ប្រជែង​ស្បែកជើង​មាស​ផ្សេងទៀត ម្ចាស់​ស្បែកជើង​មាស ២​សម័យ​ជាប់​គ្នា​រូបនេះនាំមុខ​កីឡាករ​ឈរ​លេខ​២ Abee Huber របស់​អាស៊ី​អឺរ៉ុប ១​គ្រាប់ ខណៈ​កីឡាករ ៥​រូប​ទៀតរកបាន ៩​គ្រាប់​ស្មើគ្នាគឺមាន​កីឡាករ ចាន់ វឌ្ឍនាកា របស់​បឹងកេត​, កីឡាករ Marcio របស់​ណាហ្គា​វើ​ល​ដ៏​, កីឡាករ កែវ សុខ​ផេង​, Ajayi Opeyemi Korede និង Marcus Haber របស់​វិសាខា។​ ​គួរ​ដឹងថា ខ្សែប្រយុទ្ធ​សញ្ជាតិ​កា​មេ​រ៉ូ​ន Jean Marie Privat បានឈ្នះ​ស្បែកជើង​មាស ២​សម័យកាលពី​ឆ្នាំ​២០១៩ និង​ឆ្នាំ​២០២០ ក្នុងនោះ​កាលពី​ឆ្នាំ​២០១៩ គេ​រកបាន​គ្រាប់​បាល់​សរុប ៣៦​គ្រាប់ ខណៈ​កាល​ឆ្នាំ​២០២០ ខ្សែប្រយុទ្ធ​ពូ​កូ​ស៊ុត​រូបនេះ​រកបាន ១៦​គ្រាប់។ ដូច្នេះ​បើ​ធៀប​នឹង​រដូវ​កាល​មុន Privat នៅ​ខ្វះ ៥​គ្រាប់​ទៀត​ប៉ុណ្ណោះនឹង​តាម​ទាន់​កំណត់ត្រា​ចាស់ ដែល​ខ្លួន​បានរួម​ចំណែក​ជួយ​ក្រុម​ឈ្នះ​ជើងឯក​រងកាលពី​ឆ្នាំមុន។​

​យ៉ាងណាមិញ​ក្រឡេក​មក​ចាប់អារម្មណ៍​ការប្រកួត​លី​គ​កំពូល​កម្ពុជាឆ្នាំ​២០២១ បច្ចុប្បន្ន​ត្រូវបាន​គណៈកម្មការ​ប្រកួត​បាល់ទាត់​ជាតិ​កម្ពុជា សម្រេច​ពន្យារពេល​ប្រកួត​ជា​បណ្ដោះអាសន្ន រហូតដល់​ថ្ងៃទី​១២ ខែសីហា ដើម្បី​ចូលរួម​ទប់ស្កាត់​ការរីក​រាលដាល​ជំងឺ​កូ​វីដ​-១៩ ជាមួយ​រាជរដ្ឋាភិបាល​កម្ពុជា ពិសេស​ក្រោយ​ផ្ទុះ​ការ​រី​ល​រាល​នូវ​ជំងឺ​កូ​វីដ​-១៩ បំប្លែង​ថ្មី​ប្រភេទ​ដែល​តា (Delta) ក្នុង​សហគមន៍​តែម្ដង៕

​អត្ថបទ៖ លី ឈុន​ឡា