ក្នុងជំនួបជាមួយសម្ដេចរដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រ​កម្ពុជា ឯកអគ្គរដ្ឋទូតសហភាពអឺរ៉ុបប្រចាំកម្ពុជា (EU) សន្យាបន្តពង្រឹងទំនាក់ទំនងជាមួយកម្ពុជា ដើម្បីជួយដល់សេដ្ឋកិច្ចឱ្យកាន់តែរឹងមាំជាងនេះ។

ការសន្យារបស់ឯកឧត្តម ទ្រីសម៉ាន់ អ៊ីហ្គោរ៍ ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុង​ឱកាស​សម្ដេចរដ្ឋសភាធិការធិបតី ឃួន សុដារី ប្រធានរដ្ឋសភា អនុញ្ញាតទទួល​ជួប​សវនាការ​សម្តែង​ការ​គួរសម និងពិភាក្សាការងារ នៅវិមានរដ្ឋសភា នៅថ្ងៃទី១៥ ខែឧសភា ឆ្នាំ២០២៤នេះ។

សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅដល់ប្រជាជន ក៏ដូច​ជា​រដ្ឋាភិបាល​របស់​ប្រទេសសមាជិកសហភាពអឺរ៉ុបទាំងមូល ដែលតែងតែបាន​ជួយជ្រោមជ្រែង​ក្នុង​ដំណើរ​ការ​កសាង​ស្តារសន្តិភាព និងកាអភិវឌ្ឍន៍នៅកម្ពុជាតាំងពីទស្សវត្សន៍ឆ្នាំ១៩៩០។ លើសពីនោះ សហភាពអឺរ៉ុប បានចូលរួមពង្រឹងកិច្ចសហប្រតិបត្តិការជាមួយក្នុងក្របខណ្ឌទ្វេភាគី ក៏ដូចជា​ក្នុងថ្នាក់​តំបន់ជាសមាជិកអាស៊ាន រួមទាំងក្នុង​ឋានៈជាសមាជិក​លើកិច្ចព្រមព្រៀង​សេដ្ឋកិច្ច​គ្រប់​ជ្រុងជ្រោយជាដើម។

ឆ្លៀតក្នុងឱកាសនេះ ភាគីទាំងពីរ បានពិភាក្សា និងបានបញ្ជាក់ពីទំនាក់ទំនងទ្វេភាគីរវាងកម្ពុជា និងសហភាពអឺរ៉ុបដែលបានដំណើរការទៅរយៈពេលជាច្រើនទស្សវត្សន៍មកហើយ ដោយ​ពេល​ក្នុង​ដំណាក់កាលដំបូងសហភាពអឺរ៉ុបបានជួយកម្ពុជាទៅលើដំណើរការស្តារ ការកំណែ​ទម្រង់​អភិបាល​កិច្ច​​ទៅលើវិស័យជាច្រើន រួមមាន វិស័យអប់រំ វិស័យសុខាភិបាល ជាពិសេស​ផ្តោត​ទៅ​លើ​វិស័យ​បៃតង សំដៅការអភិវឌ្ឍន៍ឱ្យមានភាពធន់ រឹងមាំ និងប្រកបដោយចីរភាព ដែលវិស័យ​ទាំងអស់​នេះ​ជាស្នូលដល់កិច្ចសហប្រតិបត្តិការរបស់ភាគីទាំងពីរ។

ក្នុងជំនួបនេះដែរ ភាគីទាំងពីរក៏មានការពិភាក្សាទៅការងារសិទ្ធិមនុស្ស ដំណើរការលទ្ធិ​ប្រជាធិប​តេយ្យ ដោយសារក្នុងពេលកាលពីឆ្នាំ២០២៣កន្លងទៅ កម្ពុជា​បាន​ដំណើរ​ការ​រៀបចំ​បោះឆ្នោត​ត្រឹម​ត្រូវ​ទៅតាមលទ្ធិប្រជាធិបតេយ្យ ហើយចំនួនប្រជាពលរដ្ឋចូលរួមបោះឆ្នោតដ៏ច្រើនលើសលប់ ដែល​ជាលទ្ធផលគណបក្សប្រជាជនកម្ពុជាឈ្នះឆ្នោតក្នុងការបន្តដឹកនាំរាជរដ្ឋាភិបាល នីតិកាល​ទី៧ ដែលនេះសបញ្ជាក់ថា ដំណើរការបោះឆ្នោតឈរលើវិថីមួយដ៏ត្រឹមត្រូវ និង​បាន​អនុញ្ញាត​ឱ្យ​គណបក្ស​ប្រជាជនកម្ពុជាបានផ្ទេរពីការដឹករបស់អ្នកជំនាន់មិនទៅអ្នកជំនាន់ថ្មី ប្រកបដោយភាព​ស្វាហាប់ និងមានឆន្ទះច្បាស់លាស់ក្នុងវិស័យនយោបាយ ក្នុងគោល​ដៅ​បន្ត​សហការ​ឱ្យ​បាន​ថែម​ទៀត​ជា​មួយ​សហភាពអឺរ៉ុប។

យ៉ាងណាមិញ ក្នុងជំនួបនៅថ្ងៃនេះ ឯកឧត្តម ឯកអគ្គរដ្ឋទូត បានប្តេជ្ញាចិត្តក្នុង​ការ​ជំរុញ​ទំនាក់​ទំនង​បន្ថែម​ទៀតរវាងរដ្ឋាភិបាលសហភាពអឺរ៉ុបជាមួយរដ្ឋសភាកម្ពុជា ជាពិសេសប្រជាជន​កម្ពុជា​ជាមួយ​ប្រជាជននៅទ្វីបអឺរ៉ុប ក្នុងគោលដៅតភ្ជាប់រវាងតំបន់អាស៊ាន ជាមួយអឺរ៉ុបឱ្យមានភាពរឹងមាំ និងមានចំនួនប្រជាជនកាន់តែច្រើន ហើយក៏ជាដៃគូសេដ្ឋកិច្ចកាន់តែរីកចម្រើនជាងមុន៕

អត្ថបទ សេក ឧត្តម