ក្រុមហ៊ុនអវកាសឯកជនរបស់សហរដ្ឋអាមេរិក ស្ពេស-អ៊ិច (SpaceX) បានបាញ់បង្ហោះអ៊ីនធឺណិតផ្កាយរណប ស្តារលីង (Starlink) ចំនួន ២០ គ្រឿងបន្ថែមទៀតទៅកាន់គន្លងតារាវិថីកាលពីថ្ងៃអង្គារ (១៤ ឧសភា) ដែលក្នុងនោះមាន ១៣ គ្រឿងដែលមានសមត្ថភាពដោយផ្ទាល់ទៅលើសេវាទូរសព្ទ។

ផ្កាយរណបអ៊ីនធឺណិតទាំងនេះត្រូវបានបាញ់បង្ហោះនៅលើយានចម្លង ហ្វាលខន-៩ (Falcon 9) នៅម៉ោង ១១:៣៩ នាទីព្រឹក (ម៉ោងនៅប៉ាស៊ីហ្វិក) ពីមូលដ្ឋានកងកម្លាំងអវកាស វេនឌែនប៊ឺក (Vandenberg) ក្នុងរដ្ឋកាលីហ្វ័រនីញ៉ា (California) នេះបើយោងតាម SpaceX ។

ប៉ុន្មាននាទីក្រោយមក ឧបករណ៍ជំរុញដំណាក់កាលទី១ របស់យាន ហ្វាលខន-៩ បានត្រលប់មកវិញ ហើយបានចុះចតនៅលើយានដ្រូនមួយគ្រឿង ដែលមានទីតាំងនៅក្នុងមហាសមុទ្រប៉ាស៊ីហ្វិក ហើយក្រោយមក SpaceX បានបញ្ជាក់ពីការដាក់ពង្រាយផ្កាយរណបចំនួន ២០ គ្រឿងនេះនៅលើគេហទំព័ររបស់ខ្លួន។

ក្រុមហ៊ុនអវកាសខ្នាតយក្សរបស់សហរដ្ឋអាមេរិក មួយនេះបាននិយាយថា អ៊ីនធឺណិតផ្កាយរណប ស្តារលីង នឹងផ្តល់សេវាអ៊ីនធឺណិតល្បឿនលឿនដល់ទីតាំងនានាដែលការចូលប្រើអ៊ីនធឺណិតមិនគួរឱ្យទុកចិត្ត មានតម្លៃថ្លៃ ឬមិនអាចប្រើបានទាំងស្រុង៕