រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) បានសន្យាកាលពីថ្ងៃអង្គារ (១៤ ឧសភា) ក្នុងដំណើរទស្សនកិច្ចទៅកាន់ទីក្រុងគីវ ស្របពេលដែលរុស្ស៊ី កំពុងធ្វើការវាយប្រហារថ្មីៗនៅភាគខាងកើតរបស់ប្រទេសនេះថា សហរដ្ឋអាមេរិក នឹងឈរក្បែរអ៊ុយក្រែន រហូតដល់អធិបតេយ្យភាពសន្តិសុខរបស់ខ្លួនត្រូវបានធានា។

ប្រមុខការទូតរបស់សហរដ្ឋអាមេរិករូបនេះ គឺជាមន្ត្រីជាន់ខ្ពស់អាមេរិកដំបូងគេដែលធ្វើដំណើរទៅកាន់ប្រទេសអ៊ុយក្រែន បន្ទាប់ពីសភាសហរដ្ឋអាមេរិក បានអនុម័តកាលពីខែមុន នូវកញ្ចប់ជំនួយយោធាចំនួន ៦១ ពាន់លានដុល្លារ បន្ទាប់ពីការពន្យារពេលជាច្រើនខែ ក្នុងអំឡុងពេលដែលរុស្ស៊ី កំពុងមានប្រៀបនៅលើសមរភូមិ។

នៅក្នុងសុន្ទរកថាគោលនយោបាយនៅវិទ្យាស្ថានពហុបច្ចេកទេស អ៊ីហ្គោ ស៊ីខូស្គី (Igor Sikorsky) ក្នុងទីក្រុងគីវ លោក ប្លីងខិន បានទទួលស្គាល់ថាការពន្យារពេលនៃអាវុធរបស់សហរដ្ឋអាមេរិក បានធ្វើឱ្យអ៊ុយក្រែនកាន់តែងាយរងគ្រោះចំពោះការវាយប្រហាររបស់រុស្ស៊ី ប៉ុន្តែបាននិយាយថាទីក្រុងគីវ អាចពឹងផ្អែកលើការគាំទ្ររបស់ទីក្រុងវ៉ាស៊ីនតោន ពីព្រោះប្រជាជនអាមេរិក យល់ថារុស្ស៊ី នឹងមិនឈប់ត្រឹមតែយកអ៊ុយក្រែន ប៉ុណ្ណឹងទេ។

លោក ប្លីងខិន បានទៅដល់ទីក្រុងគីវ តាមរថភ្លើងកាលពីព្រឹកថ្ងៃអង្គារ ក្នុងដំណើរទស្សនកិច្ចមិនបានបង្ហាញពីមុន ដែលកើតឡើងប៉ុន្មានថ្ងៃបន្ទាប់ពីប្រទេសរុស្ស៊ី បានបើកការលុកលុយនៅភាគខាងជើងនៃតំបន់ខាគីវ ដោយបើកសមរភូមិថ្មី និងបង្កើនកម្លាំងបន្ថែម៕