អ៊ីរ៉ង់៖ អ៊ីរ៉ង់បានច្រានចោលរាល់កិច្ចប្រឹងប្រែងរបស់សហរដ្ឋអាមេរិក ក្នុងការព្យាយាមដាក់ទណ្ឌកម្មទាំងអស់របស់អង្គការសហប្រជាជាតិឡើងវិញទៅលើប្រទេសនេះ ខណៈការដាក់សម្ពាធសេដ្ឋកិច្ចពីទីក្រុងវ៉ាស៊ីនតោនបានជំរុញឲ្យរូបិយប័ណ្ណក្នុងស្រុក ធ្លាក់ចុះដល់កម្រិតទាបបំផុតមិនធ្លាប់មានកាលពីថ្ងៃអាទិត្យ។
រូបិយប័ណ្ណរបស់អ៊ីរ៉ង់បានធ្លាក់ចុះដល់ ២៧២.៥០០រីយ៉ាល់ទល់នឹងដុល្លារអាមេរិកនៅតាមហាងប្តូរប្រាក់ទូទាំងទីក្រុងតេអេរ៉ង់។ ប្រាក់រីយ៉ាល់បានធ្លាក់ថ្លៃជាង ៣០% ទល់នឹងប្រាក់ដុល្លារអាមេរិកចាប់តាំងពីខែមិថុនា ខណៈដែលការដាក់សម្ពាធទណ្ឌកម្មរបស់អាមេរិក ទៅលើប្រទេសអ៊ីរ៉ង់បន្តបំបាក់សមត្ថភាពរបស់ខ្លួនដើម្បីលក់ប្រេងឥន្ធនៈជាសកល។ រូបិយប័ណ្ណរបស់អ៊ីរ៉ង់មានតម្លៃត្រឹម ៣២.០០០រីយ៉ាល់ស្នើនឹង ១ដុល្លារអាមេរិកនៅពេលមានកិច្ចព្រមព្រៀងនុយក្លេអ៊ែរឆ្នាំ២០១៥ របស់ទីក្រុងតេអេរ៉ង់ជាមួយប្រទេសមហាអំណាចពិភពលោក ដែលត្រូវបានចុះហត្ថលេខាដោយរដ្ឋបាលលោក អូបាម៉ា ប៉ុន្តែរដ្ឋបាលរបស់លោក ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀងនេះ។ នៅពេលរូបិយប័ណ្ណធ្លាក់ចុះ អ្នកនាំពាក្យក្រសួងការបរទេសអ៊ីរ៉ង់ លោក សាអ៊ីតខាទីប ហ្សាដេស បានរិះគន់ធ្ងន់ៗចំពោះសេចក្ដីប្រកាសរបស់រដ្ឋបាលលោក ត្រាំ កាលពីថ្ងៃសៅរ៍កន្លងទៅថា ទណ្ឌកម្មទាំងអស់របស់អង្គការសហប្រជាជាតិ ប្រឆាំងអ៊ីរ៉ង់ត្រូវបានធ្វើឡើងសារជាថ្មី ពីព្រោះទីក្រុងតេអេរ៉ង់មិនគោរពតាមកិច្ចព្រមព្រៀងនុយក្លេអ៊ែរនោះ៕
អត្ថបទ៖ រិទ្ធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
