​បាល់បោះ៖ ​ក្រុម​បាល់បោះ​សហរដ្ឋអាមេរិក ​បាន​យកឈ្នះ​ក្រុម​អេ​ស្ប៉ា​ញ​ក្នុង​ព្រឹត្តិការណ៍​អូឡាំពិក ៤លើក​ជាប់​គ្នា ​ដើម្បី​ឡើង​វគ្គពាក់កណ្តាល​ផ្តាច់ព្រ័ត្រ​នៅ​អូឡាំពិក​ទីក្រុង​តូ​ក្យូ​។ ​​អេ​ស្ប៉ា​ញ​បាន​នាំមុខ​ការប្រកួត​នេះ​នៅ​វគ្គ​ទី២ ពិន្ទុ ៤០ ទល់នឹង ២៩ ក្នុងនោះ​កីឡាករ Ricky Rubio របស់​ក្រុម Minnesota នៅ​ក្របខណ្ឌ NBA រកបាន ១១ពិន្ទុ​ម្នាក់ឯង​។

​​តែ​ក្រុម​ការពារ​ជើងឯក​អាមេរិក បាន​វាយបក​វិញ​ដូច​ទឹកបាក់​ទំនប់​រហូត​តាម​ស្មើ​វិញ ៤៣-៤៣ វិញ​ត្រឹម​ពាក់​កណ្តាលផ្លូវ និង​ចាប់ផ្តើម​គ្រប់គ្រង​ការប្រកួត​ចាប់ពី​វគ្គ​ទី៣ ទៅ​។ ​​Kevin Durant ជាថ្មី​ម្តងទៀត​គឺជា​អ្នក​រកបាន​ច្រើន​ពិន្ទុ​ជាងគេ​ដល់ ២៩ពិន្ទុ​ឱ្យ​អាមេរិក​យកឈ្នះ​លទ្ធផល​សរុប ៩៥-៨១ តែ​ក្រុម​អេ​ស្ប៉ា​ញ​ដែល​ចាញ់​នោះ​កីឡាករ Ricky Rubio រកបាន​ដល់​ទៅ ៣៨ពិន្ទុ​។ ជ័យជំនះ​នេះ​ធ្វើឱ្យ​អាមេរិក​ឡើង​វគ្គ​ពាក់កណ្តាល​ផ្តាច់ព្រ័ត្រ ​ជួប​ជាមួយ​អូស្ត្រាលី​ដែល​យកឈ្នះអា​ហ្ស​ង់​ទីន ៩៧-៥៩​។

​​កីឡាករ​របស់​ក្រុម San Antonio Spurs, Patrick Mills ជា​អ្នក​រកបាន​ច្រើន​ពិន្ទុ​ជាងគេ ១៨ពិន្ទុ​ក្នុង​ជ័យជំនះ​នេះ​។ ​​សូមបញ្ជាក់ថា ក្នុង​ប្រវត្តិសាស្ត្រ​កីឡាបាល់បោះ​នៅ​អូឡាំពិក ​មានតែ​អាមេរិក​ទេ​ឈ្នះ​មេដាយមាស​ច្រើនជាងគេ​សរុប ១៤លើក​តាំងពី​អូឡាំពិក​ដំបូង​នៅ​ឆ្នាំ១៩៣៦​។ ​​តាំងពី​អតីត​សហភាពសូវៀត​ឈ្នះ​មេដាយមាស​នៅ​ឆ្នាំ១៩៨៤ អាមេរិក​បានឈ្នះ​មេដាយមាស ៣ព្រឹត្តិការណ៍​ជាប់​គ្នា​ មុនពេល​អា​ហ្ស​ង់​ទីន​ឈ្នះ​ម្តង​នៅ​ឆ្នាំ២០០៤ នៅ​ទីក្រុង​អា​តែ​ន​ប្រទេស​ក្រិ​ក បន្ទាប់មក​អាមេរិក​ឈ្នះ​មេដាយមាស ៣ព្រឹត្តិការណ៍​ជាប់​គ្នា​ទៀត​៕

​អត្ថបទ​៖​នាង សុភា​វុ​ធ