រដ្ឋបាលលោក Joe Biden កំពុងធ្វើការដើម្បីបញ្ជូនអាគុយរបស់ប្រព័ន្ធការពារដែនអាកាស Patriot បន្ថែមទៀតទៅកាន់ប្រទេសអ៊ុយក្រែន។ នេះបើតាមការឲ្យដឹងពីបុគ្គលដែលដឹងពីបញ្ហានេះ ខណៈដែលសហរដ្ឋអាមេរិក និងសម្ព័ន្ធមិត្តរបស់ខ្លួន កំពុងប្រឹងប្រែងជួយបំពេញតាមតម្រូវការរបស់ប្រទេសនេះ ក្នុងការពង្រឹងការការពារដែនអាកាសបន្ថែមទៀត ដើម្បីទប់ទល់នឹងការវាយលុករបស់រុស្ស៊ីដែលមានកាន់តែខ្លាំងឡើងៗ។

បើយោងតាមបុគ្គលដែលសុំមិនបញ្ចេញអត្តសញ្ញាណ នៅពេលពិភាក្សាអំពីការពិចារណាឯកជននេះ បានឲ្យដឹងថា អាមេរិកកំពុងស្វែងរកការបញ្ជូនអាគុយតែមួយគ្រាប់គត់ រួមជាមួយរ៉ាដា។ ជាមួយគ្នានេះ បុគ្គលនោះបានប្រាប់ទៀតថា សម្ព័ន្ធមិត្តអ៊ឺរ៉ុបរបស់អ៊ុយក្រែន ក៏កំពុងធ្វើការលើផែនការ ក្នុងការបញ្ជូនប្រព័ន្ធការពារដែនអាកាសបន្ថែមទៅកាន់ទីក្រុងគីវ ពីកន្លែងស្តុករបស់ពួកគេផងដែរ។

ក្នុងសប្តាហ៍នេះ ប្រធានាធិបតីអ៊ុយក្រែន លោក Volodymyr Zelensky បានប្រាប់រដ្ឋមន្ត្រីការបរទេសអាមេរិក លោក Antony Blinken ដែលកំពុងបំពេញទស្សនកិច្ចនៅទីក្រុងគីវ Kyiv ថា ប្រទេសរបស់លោកត្រូវការប្រព័ន្ធ Patriot ចំនួន២ សម្រាប់ទីក្រុង Kharkiv តែមួយប៉ុណ្ណោះ ដែលទីនេះជាទីតាំងនៃការវាយលុកថ្មីរបស់រុស្ស៊ី។

ពាក់ព័ន្ធនឹងការលើកឡើងនេះ អ្នកនាំពាក្យក្រុមប្រឹក្សាសន្តិសុខជាតិសេតវិមាន និងមន្ទីរបញ្ចកោណ មិនបានធ្វើការអត្ថាធិប្បាយអ្វីឡើយ ភ្លាមៗនេះ។ រដ្ឋាភិបាល Zelensky បានអំពាវនាវដល់សម្ព័ន្ធមិត្តមួយចំនួននូវថវិកាចំនួន ១ពាន់លានដុល្លារអាមេរិក សម្រាប់អាគុយរបស់ប្រព័ន្ធមីស៊ីល Patriot និងប្រព័ន្ធការពារអាកាសផ្សេងទៀត។

នៅឆ្នាំ២០២២ សហរដ្ឋអាមេរិកបានប្រកាសថា ខ្លួនកំពុងបញ្ជូនអាគុយ Patriot ១គ្រាប់ និងបានបន្តផ្គត់ផ្គង់មីស៊ីលជាបន្តបន្ទាប់ ដើម្បីផ្គត់ផ្គង់នូវអ្វីដែលគេជឿថា ជាប្រព័ន្ធ ២ផ្សេងទៀត នៅក្នុងប្រទេសផងដែរ។ ក្នុងខែមេសា ប្រទេសអាល្លឺម៉ង់បានប្តេជ្ញាបញ្ជូនប្រព័ន្ធ Patriot មួយផ្សេងទៀតទៅអ៊ុយក្រែន៕