អង្គការសហប្រជាជាតិ (UN) បានកាត់បន្ថយការប៉ាន់ស្មានមកជិតពាក់កណ្ដាល សម្រាប់ចំនួនស្ត្រី និងកុមារ ដែលត្រូវបានសម្លាប់ក្នុងសង្គ្រាមអ៊ីស្រាអែល នៅតំបន់ហ្កាហ្សា ដោយបានស្នើឲ្យមានការត្រួតពិនិត្យថ្មី សម្រាប់តួលេខដែលផ្ដល់ឲ្យដោយក្រុមសកម្មប្រយុទ្ធហាម៉ាស។

គួរបញ្ជាក់ថា បើយោងតាមទិន្នន័យដែលបានចេញផ្សាយដោយ UN កាលពីថ្ងៃទី៦ ខែឧសភា បានបង្ហាញថា ចាប់តាំងពីសង្រ្គាមបានចាប់ផ្តើមផ្ទុះឡើង ក្នុងចំណោមមនុស្ស ៣៤.៧៣៥នាក់ ដែលបានស្លាប់នៅហ្កាហ្សា ច្រើនជាង ៩.៥០០នាក់ ជាស្ត្រី និងច្រើនជាង ១៤.៥០០នាក់ ជាកុមារ។

ប៉ុន្តែនៅក្នុងទិន្នន័យថ្មីដែលត្រូវបានចេញផ្សាយ ២ថ្ងៃក្រោយមក នៅថ្ងៃទី៨ ខែឧសភា UN បានកាត់បន្ថយតួលេខយ៉ាងច្រើន ចំពោះស្ត្រី មកត្រឹម ៤.៩៥៩នាក់ និងចំពោះកុមារ មកត្រឹម ៧.៧៩៧នាក់ ក្នុងចំណោមមនុស្ស ៣៤.៨៤៤នាក់ ដែលត្រូវបានគេរាយការណ៍ថា បានស្លាប់ នៅក្នុងតំបន់ហ្កាហ្សា។

UN បានដកស្រង់ទិន្នន័យពីក្រសួងសុខាភិបាលតំបន់ហ្កាហ្សា ដែលគ្រប់គ្រងដោយក្រុមហាម៉ាស ដើម្បីបង្កើតតួលេខជនរងគ្រោះ។ របាយការណ៍របស់ UN បានភ្ជាប់មកជាមួយការបដិសេធ ដែលលើកឡើងថា «រហូតមកដល់ពេលនេះ UN មិនទាន់អាចបង្កើតតួលេខអ្នកស្លាប់ និងរបួស ដោយឯករាជ្យ ទូលំទូលាយ និងជាក់លាក់បានទេ»។

នៅក្នុងសេចក្តីថ្លែងការណ៍ទៅកាន់សារព័ត៌មាន USA TODAY អ្នកនាំពាក្យ UN លោកស្រី Eri Kaneko បានប្រាប់ថា ចំនួនអ្នកស្លាប់សរុបរបស់ក្រសួងសុខាភិបាលនៅហ្កាហ្សា នៅតែមិនប្រែប្រួល ហើយបានលើកឡើងពីបច្ចុប្បន្នភាពថ្ងៃទី៣០ ខែមេសា របស់ក្រសួងស្តីពីការវិភាគនៃអ្នកស្លាប់ចំនួន ២៤.៦៨៦នាក់ ដែលក្រសួងមានព័ត៌មានលម្អិតពេញលេញ៕