កូរ៉េខាងជើងបានសម្អាតប្រាក់កខ្វក់ចំនួន ១៤៧,៥លានដុល្លារ តាមរយៈវេទិការូបិយប័ណ្ណនិម្មិត Tornado Cash នៅក្នុងខែមីនា បន្ទាប់ពីបានលួចពីការដោះដូររូបិយប័ណ្ណគ្រីបតូ ក្នុងឆ្នាំ២០២៣។ នេះបើយោងតាមការងារសម្ងាត់ពីអ្នកឃ្លាំមើលការដាក់ទណ្ឌកម្មរបស់អង្គការសហប្រជាជាតិ (UN) ដែលសារព័ត៌មាន Reuters បានឃើញ កាលពីថ្ងៃអង្គារ (ទី១៤ ខែឧសភា)។

នៅក្នុងឯកសារមួយដែលបានដាក់ជូន កាលពីថ្ងៃសុក្រសប្ដាហ៍កន្លងមក ក្រុមអ្នកឃ្លាំមើលបានប្រាប់គណៈកម្មាធិការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិថា ពួកគេបានធ្វើការស៊ើបអង្កេត ៩៧ករណីដែលត្រូវបានសង្ស័យថា ជាការវាយប្រហារតាមអ៊ីនធឺណិតរបស់កូរ៉េខាងជើងលើក្រុមហ៊ុនរូបិយប័ណ្ណគ្រីបតូ ចន្លោះឆ្នាំ២០១៧ និងឆ្នាំ២០២៤ ដែលមានតម្លៃប្រហែល ៣,៦ពាន់លានដុល្លារ។

ដោយដកស្រង់ព័ត៌មានពីក្រុមហ៊ុនវិភាគគ្រីបតូ PeckShield និងក្រុមហ៊ុនស្រាវជ្រាវប្លុកឆេន Elliptic អ្នកឃ្លាំមើលបានប្រាប់គណៈកម្មាធិការថា ទាំងនោះរាប់បញ្ចូលទាំងការវាយប្រហារនៅចុងឆ្នាំ២០២៣ ដែលទឹកប្រាក់ ១៤៧,៥លានដុល្លារ ត្រូវបានលួចពីការដោះដូររូបិយប័ណ្ណគ្រីបតូ មុនពេលសម្អាតប្រាក់នោះ ក្នុងខែមីនា ឆ្នាំ២០២៤។

ក្រុមអ្នកឃ្លាំមើលបាននិយាយថា យោងទៅតាមរដ្ឋជាសមាជិករបស់ UN និងក្រុមហ៊ុនឯកជន បានឲ្យដឹងថា បុគ្គលិកផ្នែកព័ត៌មានវិទ្យារបស់កូរ៉េខាងជើងដែលកំពុងប្រតិបត្តិការនៅបរទេសបង្កើត «ប្រាក់ចំណូលយ៉ាងច្រើនមហាសាលសម្រាប់ប្រទេសរបស់ពួកគេ»។

គួរបញ្ជាក់ថា ដោយត្រូវបានគេស្គាល់ជាផ្លូវការថា ជាសាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង) កូរ៉េខាងជើងបានស្ថិតនៅក្រោមការដាក់ទណ្ឌកម្មរបស់ UN ចាប់តាំងពីឆ្នាំ២០០៦ ហើយវិធានការទាំងនោះ ត្រូវបានពង្រឹងក្នុងរយៈពេលជាច្រើនឆ្នាំ ក្នុងគោលបំណងកាត់បន្ថយមូលនិធិ សម្រាប់កម្មវិធីមីស៊ីលបាលីស្ទិក និងនុយក្លេអ៊ែររបស់ប្រទេសនេះ។ ពាក់ព័ន្ធនឹងការលើកឡើងនេះ បេសកកម្មរបស់កូរ៉េខាងជើងប្រចាំនៅ UN ក្នុងទីក្រុងញូវយ៉ក សហរដ្ឋអាមេរិក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕