នាយកគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva បានព្រមានថា បញ្ញាសិប្បនិម្មិត (AI) នឹងប៉ះពាល់យ៉ាងខ្លាំងក្លាដល់ទីផ្សារការងារដូច «រលកយក្សស៊ូណាមិ»។

លោកស្រី Georgieva បានលើកឡើងថា ចាប់តាំងពីការចាប់ផ្តើមមាន AI មក អ្នកជំនាញបានពិភាក្សាអំពីគុណសម្បត្តិ និងគុណវិបត្តិរបស់វា សម្រាប់កម្លាំងពលកម្ម។ អ្វីដែលសំខាន់នោះ គឺថា តើឧបករណ៍ដែលមានសមត្ថភាពបញ្ចូលថាមពលលើបរិមាណផលិតភាពដោយស្វ័យប្រវត្តិតាមរយៈការធ្វើកិច្ចការជាទម្លាប់អាចធ្វើឲ្យមនុស្សរាប់លាននាក់គ្មានការងារដែរ ឬទេ? ឬការផ្លាស់ប្តូរបច្ចេកវិជ្ជា នឹងស្វែងរកមធ្យោបាយដូចដែលវាតែងតែធ្វើ ដើម្បីបង្កើតតួនាទីថ្មី ដើម្បីជំនួសតួនាទីលែងប្រើ?

អំឡុងព្រឹត្តិការណ៍មួយនៅទីក្រុង Zurich ប្រទេសស្វីស លោកស្រី Georgieva បាននិយាយថា៖ «វាអាចនាំឲ្យផលិតភាពកើនឡើងយ៉ាងខ្លាំង ប្រសិនបើយើងគ្រប់គ្រងវាឲ្យបានល្អ ប៉ុន្តែវាក៏អាចនាំឲ្យមាននូវព័ត៌មានខុសឆ្គង ហើយជាការពិតណាស់ កើតមាននូវវិសមភាពកាន់តែច្រើននៅក្នុងសង្គមរបស់យើង»។

ខណៈពេលដែលនៅតែជាកម្លាំងដ៏សំខាន់ដែលអាចរំខានដល់សេដ្ឋកិច្ចពិភពលោក AI ទំនងជានឹងមានភាពអចិន្ត្រៃយ៍ជាងការភ័យខ្លាចពីអតិផរណា ឬវិបត្តិសេដ្ឋកិច្ច។ ក្នុងរបាយការណ៍របស់ IMF ខែមករាអំពី AI ដែលនិពន្ធដោយលោកស្រី Georgieva លោកស្រីបានបញ្ចេញសម្លេងសុទិដ្ឋិនិយមបន្ថែមទៀត អំពីការសន្យារបស់ AI។ លោកស្រីបានសរសេរថា៖ «យុគសម័យ AI ស្ថិតនៅលើយើង ហើយវានៅតែស្ថិតក្នុងអំណាចរបស់យើង ដើម្បីធានាថា វានាំមកនូវភាពរុងរឿងសម្រាប់យើងទាំងអស់គ្នា»។

ឥឡូវនេះ លោកស្រី Georgieva មើលទៅកាន់តែព្រួយបារម្ភ។ តែវាប្រហែលជាមិនគួរឲ្យភ្ញាក់ផ្អើលទាំងស្រុងទេដោយពិចារណាលើរបាយការណ៍ខែមករាដូចគ្នាដែលបានព្យាករថា AI នឹងប៉ះពាល់ដល់ការងារជាច្រើន នៅទូទាំងឧស្សាហកម្មផ្សេងៗគ្នាជាច្រើន។ យោងតាមរបាយការណ៍នោះ បានឲ្យដឹងថា AI នឹងប៉ះពាល់ដល់ការងារប្រហែល ៤០ភាគរយ នៅទូទាំងពិភពលោក។ នៅក្នុងប្រទេសដែលមានសេដ្ឋកិច្ចជឿនលឿន ចំនួននោះនឹងកាន់តែខ្ពស់ជាមួយនឹងការប៉ាន់ស្មាន ៦០ភាគរយនៃការងារដែលរងផលប៉ះពាល់ពី AI៕