កំពង់ឆ្នាំង ៖ ក្រសួងអភិវឌ្ឍន៍ជនបទ ចាត់ទុកការស្ថាបនា ស្តារ ថែទាំ និងការកែលម្អហេដ្ឋរចនាសម្ព័ន្ធ គឺជាការវិនិយោគដ៏ចាំបាច់ ដើម្បីសម្រួល ដល់គមនាគមន៍ និងការផ្តល់សេវាសាធារណៈផ្សេងៗជូនប្រជាពលរដ្ឋគ្រប់ទិសទី និងការចូលរួមចំណែកលើកកម្ពស់ជីវភាពរស់នៅ និង ការកាត់បន្ថយភាពក្រីក្ររបស់ប្រជាពលរដ្ឋ។ 

​ឯកឧត្តមបណ្ឌិត នួន ដាញ៉ិល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១៥ ខែ ឧសភា ឆ្នាំ ២០២៤ នេះ បានដឹកនាំប្រតិភូចុះពិនិត្យវាយតម្លៃ និងបញ្ចប់សុពលភាព លើការងារស្ថាបនាផ្លូវចំនួន ៣គម្រោង នៅក្នុងខេត្តចំនួន៣រួមមាន៖ គម្រោងទី១ ការងារស្ថាបនាផ្លូវក្រាលបេតុងចំនួន ៣ខ្សែ មាន៥កំណាត់ ប្រវែងសរុប ១ ៧៥០ ម៉ែត្រ, ទទឹង ៥ ម៉ែត្រ, ចិញ្ចើមផ្លូវសងខាងក្រាលដី ល្បាយក្រួស ទទឹងម្ខាងៗ ០,៥ ម៉ែត្រ ចាប់ពីផ្លូវជាតិលេខ ៥៣ ស្ថិតក្នុងភូមិប្រចាក់ ភូមិត្រពាំងតាសុខ ភូមិព្រៃមូល និងភូមិព្រៃក្រោល ឃុំព្រៃមូល ស្រុករលាប្អៀរ ខេត្តកំពង់ឆ្នាំង។

គម្រោងទី២, ការងារស្ថាបនាផ្លូវក្រាលបេតុងចំនួន ១ខ្សែ ប្រវែង ១ ៤១៣ម៉ែត្រ, ទទឹង ៥ម៉ែត្រស្ថិតនៅភូមិឃ្លាំងមឿង ឃុំអន្លង់ត្នោត ស្រុកក្រគរ ខេត្តពោធិ៍សាត់។ ចំណែកគម្រោង ទី៣, ការងារស្ថាបនាផ្លូវក្រាលកៅស៊ូ DBST ចំនួន ១ខ្សែ ប្រវែង ៤ពាន់ម៉ែត្រ, ទទឹង ៦ម៉ែត្រ, ចិញ្ចើមផ្លូវសងខាងក្រាលដីល្បាយក្រួស ទទឹងម្ខាងៗ ១ម៉ែត្រ, ស្ថិតនៅភូមិប្រសព្វជុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដែលគម្រោងទាំងអស់នេះអនុវត្តដោយ នាយកដ្ឋានវិស្វកម្ម នៃក្រសួងការពារជាតិ។

ជុំវិញគម្រោងផ្លូវខាងលើនេះ, ឯកឧត្តមបណ្ឌិតរដ្ឋលេខាធិការ បានវាយតម្លៃខ្ពស់ ចំពោះការខិតខំប្រឹងប្រែងស្ថាបនាផ្លូវទាំងបីខ្សែនេះ សម្រេចបាន តាមផែនការ នៅក្នុងសុពលភាព និងប្រកបដោយគុណភាព ព្រោះផ្លូវនៅជនបទនេះ ក្រសួងអភិវឌ្ឍន៍ជនបទបានផ្តោតការយកចិត្តទុកដាក់យ៉ាងខ្លាំង ដោយគិតគូរពីភាពធន់និងការប្រែប្រួលអាកាសធាតុ ទាំងផ្លូវដីស, ផ្លូវល្បាយក្រួស, និងផ្លូវក្រាសកៅស៊ូពីរជាន់ ឬក្រាលបេតុង ដើម្បីបង្កភាពងាយស្រួលដល់ប្រជាពលរដ្ឋក្នុងការធ្វើដំណើរ, ចំណេញពេលវេលា, កាត់បន្ថយចំណាយលើការដឹកជញ្ជូន ឬផលិតផលផ្សេងៗ ទៅកាន់ទីផ្សារ និងភាពងាយស្រួលក្នុងការទទួលបានសេវាសាធារណៈជាដើម។

សូមបញ្ជាក់ថា ជុំវិញការអភិវឌ្ឍផ្លូវជនបទនេះ, បើយោងតាមរបាយការណ៍វឌ្ឍនភាពការងារសម្រេចបានឆ្នាំ ២០២៣ របស់ក្រសួង- អភិវឌ្ឍន៍ជនបទ ក្នុងនោះគិតត្រឹមឆ្នាំ ២០២៣ ក្រសួងបានស្ថាបនាស្តារ និងកែលម្អផ្លូវជនបទសរុបប្រវែងជាង ៥០ ពាន់គីឡូម៉ែត្រ និងបានចងក្រងជាបញ្ជីសារពើភ័ណ្ឌ និងប្រព័ន្ធគ្រប់គ្រងផ្លូវជនបទរួចរាល់ក្នុងនោះរួមមាន៖ ផ្លូវក្រាលកៅស៊ូពីរជាន់ប្រវែងជាង ៥ ពាន់គីឡូ ម៉ែត្រ, ផ្លូវក្រាលបេតុងប្រវែងជាង ១ ពាន់គីឡូម៉ែត្រ, ផ្លូវល្បាយក្រួសប្រវែងជាង ៣១ ពាន់គីឡូម៉ែត្រ, និងផ្លូវដីសប្រវែង ១២ ពាន់គីឡូ ម៉ែត្រ៕ ដោយ ៖ ស៊ុន រ៉ាឌី