រដ្ឋអាជ្ញានៃតុលាការឧក្រិដ្ឋកម្មអន្តរជាតិ (ICC)កាលពីថ្ងៃអង្គារ បានប្រឈមមុខនឹងការទាមទារឲ្យមាន    ចំណាត់ការលឿនប្រឆាំងនឹងមេដឹកនាំអ៊ីស្រាអែល និងការរិះគន់យ៉ាងធ្ងន់ៗរបស់រុស្ស៊ីជុំវិញដីកាចាប់ខ្លួនរបស់ICC សម្រាប់ប្រធានាធិបតី វ្ល៉ាឌីមៀ ពូទីន ដែលផ្តើមចេញពីការឈ្លានពានរបស់ទីក្រុងមូស្គូលើអ៊ុយក្រែន។

លោក ការីម ខាន់ (Karim Khan) បានឆ្លើយតបដោយប្រាប់ក្រុមប្រឹក្សាសន្តិសុខអង្គការសហប្រជាជាតិថា ខ្លួន នឹងមិនមានការបំភិតបំភ័យ ឬត្រូវគេបំភិតបំភ័យឡើយ នៅពេលដែលក្រុមរបស់ខ្លួនស៊ើបអង្កេតឧក្រិដ្ឋកម្មសង្រ្គាម ឬឧក្រិដ្ឋកម្មប្រឆាំងមនុស្សជាតិ ដែលអាចកើតមាន នៅក្នុងតំបន់ហ្កាហ្សា និងទឹកដីប៉ាឡេស្ទីន ក៏ដូចជានៅអ៊ុយក្រែនដែរ។

ឯកអគ្គរដ្ឋទូតរបស់ប្រទេសលីប៊ីប្រចាំនៅអង្គការសហប្រជាជាតិ លោក Taher El-Sonni បានប្រាប់លោក ខាន់ថា ប្រសិនបើករណីលីប៊ី តុលាការ ICC កំពុងស៊ើបអង្កេតមានភាពស្មុកស្មាញ ដែលពួកគេនឹងមិនត្រូវបានបញ្ចប់ រហូតដល់ដំណាច់ឆ្នាំ ២០២៥ លោកគួរតែបែងចែកកិច្ចខិតខំប្រឹងប្រែងរបស់តុលាការចំពោះសង្រ្គាមនៅតំបន់ហ្កាហ្សា។

លោក El-Sonni បានអះអាងថា អំពើប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ កំពុងត្រូវបានប្រព្រឹត្តដោយកងកម្លាំងអ៊ីស្រាអែល។

លោក El-Sonni បាននិយាយថា ពិភពលោករំពឹងថា តុលាការ ICC នឹងមានភាពក្លាហាន ហើយនឹងចេញដីកាចាប់ខ្លួនមន្ត្រីនៃរបបអ៊ីស្រាអែលដែលបានធ្វើឡើងម្តងហើយម្តងទៀតថា ពួកគេចង់ប្រព្រឹត្តអំពើប្រល័យពូជសាសន៍ប្រឆាំងនឹងប៉ាឡេស្ទីន។